Aṭas d tiɣiwanin di Tmurt n Yiqbayliyen ideg xussent tddukkliwin, iɣab nezzeh umussu asdukklan. Ma mačči ɣur yilemẓiyen i yella wugur, ad d-yekk si tama n tedbelt, n tedrimt neɣ n ttawilat. Gar tɣiwanin-a, tella tɣiwant n Draɛ Lqayed, di tdayra n Xerraṭa, i d-yezgan s wazal n 70 n yikilumitren ɣer usamar n waɣir n Bgayet. Di temnaḍt-a tamsedrart, xussen ayendin warmuden n tddukkliwin ara d-yennernin s lebɣi n yilemẓiyen, ara d-yawin ugar n tiẓeḍt i tudert tadigant n warrac d teqcicin. Ula d iqeddicen idelsanen, gersen dinna ayyuren, neɣ ɛad ɣas ad d-nini iseggasen iɛeddan. Gar tddukkliwin uɣur i d-iban uneḥbus n warmuden di tɣiwant-a n Draɛ Lqayed, ama d idelsanen neɣ uhu, d tiddukkla tadelsant “Idles” i d-ilulen deg wayyur n useggas 2017. Akken i d-yeqqar yisem-is, snernan-d kra n yilemẓiyen n temnaḍt-nni tiddukkla-a akken ad tefk tudert tamaynut i uḥric adelsan ɣur-sen. Maca daɣen ad tekki deg usaki n yimezdaɣ ɣef wayen akk icudden i tmagit d yidles, i umezruy akked usegmi n tudert. Akuden imenza mi d-tennulfa, tessaweḍ tessuddes-d kra n ttiɛadat di taddart, ama i usfuggel n Tefsut n Yimaziɣen, n Yennayer, neɣ ula d ayen icudden i tmetti, am usmekti d uheggi n kra i lmend n Wass aɣelnaw n umeɛḍur. D acu, tura akka ulac, ur d-yelli kra deg unnar, amzun akken tesbek tddukkla. «Aya i d-iḍerrun d ayen i d-yekkan nnig tezmert-nneɣ. Taggara-a, xussen cwiṭ yifassen, uqan yilemẓiyen ara ikemmlen aqeddic. Maca neḍmeɛ ad neg anejmuɛ ad as-nɛiweḍ asbedd i tnarit n tddukkla s yiɛeggalen d imaynuten », i aɣ-d-yenna yiwen n uɛeggal n tdukkla “Idles”.
M. K.