Accueil Tamazight Yennerna wammus deg usagen

Wehran

Yennerna wammus deg usagen

46

Yettuneḥsab usagen d yiwen n wadeg yesɛan azal deg tdamsa n yal tamnaḍt i deg yella, azal-is yettbin-d deg ubaɣur-is s tedrimt i d-yettawi i tmurt s umata, ma neẓra belli d amkan i deg i d-ttemlilin yiɣerruba i d-yettaččaren d sselɛa. Am wakken daɣen i yettuneḥsab d amkan n yiṣeyyaded n lḥut i iqeddcen dinna. Maca akken ad yelḥu usagen akken ilaq, tlaq ladɣa tezdeg, ama daxel-is, ama deg berra d tamiwin i as-d-yezzin.

D wagi i d ugur yerzan aṭas n yisugan, gar-asen asagen meqqren n twilayt n Wehran i ixuṣṣen nezzeh deg tezdeg. Ɣef waya, tga tenmehla n twennaḍt n Wehran yiwen n uneqqis berriken ɣef waddad n usagen-a i deg simmal yettnernay wammus. Aṭas n tamiwin ur nelhi ara daxel-is, ayagi ɣef ssebba n war tuddsa n leqdic n yiɣerruba d teflukin deg tama n usagen n ugmar d ujmaɛ n yiselman. Yedda deg urabul-nni, yezmer lewsex-agi ad yennerni sya ar sdat, acku xelḍen waman n uzuliɣ ur nelhi ara akked waman n lebḥer, rnu ula d zzit n yimuturen n yiɣerruba s tulmisin-is yakk, yerna-d ɣer waman-a, d ayen i as-d-igellun s wammus d wayen ur nelhi ara i usagen. Annect-a, yessebgan-d belli amkan-a ur igerrez ara maḍi, imi ur yettwaḥader ara, u timental n wayagi d astehzi.

Ma nebder-d ihi lḥut i yettnuzun di leswaq n temdint n Wehran, yezmer ad yili d amihi ɣef tdawsa n umdan, acku s waman ur nelhi ara i yettirid. Akked lqella n usizdeg deg tegnatin n usiweḍ-ines deg tewtilin ur nzeddig ara ddaw n yiṭij, annect-a daɣen yettawi-d rrwayeḥ n diri.

U ɣas akken wid yesselḥuyen lumur n usagen-agi n Wehran, ḥṣan s wayagi, maca ulac tigawt i xedmen akken ad d-yili deg-s kra n ubeddel, u ad yuɣal zeddig. Ahat d annect-a ara iḥettmen ɣef yimasayen n twilayt, gar-asen lwali Mulud Cirifi, ad ssutren deg-sen asegzi n ccɣel-a deg wussan i d-iteddun.
Kh. A.