Accueil Tamazight Yenqes uɣbel n waman

Ikeǧǧan – Tifra

Yenqes uɣbel n waman

62

Yal mi ara d-teḥḍer tsemhuyt n unebdu, tgellu-d s uzɣal d lḥamu-ines i d-tdal ɣef tmurt. Azɣal-agi igellu-d s lixṣaṣ n waman, imi mazal aṭas n temnaḍin di tmurt n leqbayel neɣ di lezzayer s umata xuṣṣent nezzeh deg waman, ama d wid n tissit neɣ ula d wid n tarda. Ɣef waya, wid izemren qqazen lebyur, wiyaḍ s tkeryas ttaɣen-d aman seg tudrin yesɛan leɛwanṣer. Ula d tudrin ideg xuṣṣen waman ttafent-d tifrat, d amedya n tudrin n temnaḍt n Ikeǧǧan deg ukkuẓ yid-sent, At Ɛacur, At Meḥyu, Tawrirt Uɛisa d Tesga, imi akken i myezdint deg leɛwanṣer n waman i asen-d-yettasen seg tqucac n udrar ukeffadu. Anida yal tikkelt, uqbel ad d-tekcem tsemhuyt n uzɣal, ssuddusen-d timliliyin n tcemlit, yal taddart ad d-tceyyeɛ mraw n yimaɣzalen, ad alin s adrar, ɣer yiɣbula ideg i asen-d-ttasen waman , ad ten-fersen, u ad qeɛden ityuten ma ttwaɣen neɣ wexren-d seg yimukan-nsen.

Tikwal maḍi, ttafen-d iɣbula imaynuten, acku adrar ukeffadu yeččur d aman, d anadi kan d tuddsa i ixuṣṣen. Dɣa d nnecten i gant tuddar-a imalas yezrin, anida i d-ufant snat n teɣbula deg wadeg umi ssawalen Leɛzuyab, d tiɣbula niqal i yettruḥun di lqaɛa, acku ur d-ttwaskeflent ara uqbel, armi ulin kra n yimaɣzalen ass n sem iɛeddan, sbanen-ten-id akken ilaq, gan-asen ityuten, syin rnan-ten-id ɣer tbewwaḍt n waman yellan kan din, akken ara qwun ugar. D ayen iɣef nerra lwelha deg yiseggasen-a ineggura deg temnaḍt n Ikeǧǧan, ur tenxeṣ ara seg waman am tallit yezrin, deg yiseggasen n 2 000, anida ttawḍen tikwal ttɣiman mebla aman i wazal n 15 neɣ 20 n wussan, acku ur ttwaxdamen ara akken yessefk. Maca deg tazwara n unebdu n useggas-a, ma ɛeṭlen, yettɣima uxxam sin n wussan akken ad d-tezzi nnuba-s n taččart. Yerna d aman i d-yettawḍen ɣer tberninin n yixxamen zeddigit, imi d seg udrar i d-usan.

Khaled Achoui