Accueil Tamazight Yenqes uḥerrek n umussu asdukklan

Ayt Smaɛel

Yenqes uḥerrek n umussu asdukklan

55

Ma nwala amḍan n tddukkliwin i yellan di tɣiwant n Ayt Smaɛel, 65 n yikilumitren ɣer Unẓul-asamar n Bgayet, nezmer ad d-nini yessefraḥ seg yiwet n tama. Maca ma nmuqel ɣer tigad i yettilin deg unnar, ad naf aṭas i d-yennulfan i wakken ad sɛunt kan ttesriḥ, ahat, ɣef wakken ttwalin kra yimzdaɣ. D ayen i yeǧǧan amussu asdukklan yenṭer nezzeh tallit-a di tɣiwant-a tamsedrart. Ahat ad d-nemmeslay tazwara ɣef tddukkliwin yeɣban akk, ttwaǧǧent sɣur yilemẓiyen ur d-ttwabdarent armi yemmut ttesriḥ-nsent.

Ugar n yiwen n umedya i yellan d tiddukkliwin yemmuten deg temnaḍin yemgaraden n Ayt Smaɛel, acku bran-asent yilemẓiyen i tent-id-yesnulfan, yewwi-ten uqeddic-nniḍen, war ma kkren-d yilemẓiyen ara yeddmen afḍis n umzil. Ugur-a n tuqin n yimnekkaren yeḍḥa-d yerza tiddukkliwin merra. Aḥric-nniḍen n tdukkliwin i nezmer ad d-nebder, d tid mucaɛen, maca yettaf-itent-id lḥal war armud deg teɣzi n waṭas n wayyuren. Am tddukkla tadelsant Adrar n Fad i yuɣalen cwiṭ ɣer deffir taggara-a imi, d amedya kan, yeḥbes ar tura usuffeɣ n yidlisen i yimedyazen, ur temmug tfaska n uqennuc adigan iseggasen-a ineggura.

Yuɣ lḥal, ur yufi iman-is uḥric n yidles deg Ayt Smaɛel ɣef sebba n naddam n tddukkliwin tidelsanin. Seg tesga tayeḍ, llant tddukkliwin tilemmasin i d-yettbanen tikwal, ttɣibent tikwal, am tid n tmetti d lxir. Ɣas ma yella wanida tettili tedrimt d tamentilt n ḥebbus, wanag d lɣiba n lebɣi i uqdac ɣur yilemẓiyen i d asergel amezwaru. Llant daɣen ula d tiddukkliwin n yiseqquma n tuddar deg Ayt Smaɛel i iberrun i ṭṭbel deg waman, ur d-lehhunt d taddart-nsen, ɣas yal yiwen yezmer ad d-yawi amur-is.

M. K.