Yal tikkelt, mi ara d-wwten waman n ugeffur s ṭṭaqqa, ttenfalen waman n uzuliɣ deg tlemmast n tɣiwant n Iwaḍiyen. Ɣef waya, dɣa, i yerkeb lɣiḍ imezdaɣ n uzniq n 120 n tnezduɣin n tɣiwant n Iwaḍiyin i d-yezgen deg unẓul n temdint n Tizi-Uzzu, i ibeɛden s wazal n 35 n yikilumitren ɣef ugerzu. Kkan-d waman-a deg wasif i d-yezgen deg tlemmast n temdint-agi. Syin, ttfaḍen-d ɣer uzniq ideg ttidiren, ttawḍen tikwal ɣer yiwet (1) n lmitra deg waddud, dayen i iεeggben tilḥin n yimezdaɣ deg temdint.
D yiwen n waddad ur nessefraḥ ara yakk ideg ttidiren yimezdaɣ n uzniq-agi. Dɣa, ɣef leḥsab n lehdur n yimezdaɣ, aman-agi mačči d wid kan n ugeffur, maca llan ula d aman yumsen (azuliɣ) n tudrin i d-yezzin i tɣiwant -agi, ladɣa tidak yetabaεen ɣer tɣiwant n Tizi n Tlata. «Aman-agi d-yettenfalen ɣer tlemmast n temdint, d aman n tzuliɣt (assaisonnement), dayen i izemren ad yili d amahi ilaw ɣef tdawsa tazayzayt, s ssebba n rriḥa i d-suffuɣen waman-agi», dayen i d-yenna s wurfan yiwen uεggal seg tesseqamut n uzniq tḥuza twaɣit.
Sḥassfen mliḥ yimezdaɣ n uzniq-agi s usεuẓzeg n tmeẓẓuɣt n yimḍebbren i teεna tamsatl, ladɣa aselway n Useqqamu aɣerfan aɣiwan n tɣiwant n Iwaḍiyen d imḍebber amezwaru n Dayra, i tifrat n unfel n waman-agi ɣer tlemmast n temdint-agi yebdan deg useggas n 2012. Dima ɣef leḥsab n yimezdaɣ, aɣbel-agi icudd deg tazwara ɣer umεellem n tkubbanit i d-yelhan s lebni n tnezduɣin. Uɣen yimezdaɣ deg wahil n tnada n tnezduɣin (promotion immobilière), dɣa kra kan n yiseggasen seg mi ttwazedɣent tnezduɣin-agi, iban-d lexsas meqqren deg temdint-agi. Ladɣa iban-d ubellez n uxeddim, lexsas deg yinidan iwatan ɣef temdint tamaynut. S wurfan meqqren i d-beggnen yimezdaɣ taḥraymit yesseqdec umεellem n tnezduɣin ɣef yimezdaɣ.
Akka, dɣa, i ssutren acḥal d tikkelt deg yimḍebbren n tɣiwant akken ad d-walin akked d umεellem-agi tifrat n tɣarma-agi i d-yeggran deg yir addad, maca ar ass-a, ulac yakk tiririt ɣef wayen ssuturen. Gren-d yimezdaɣ n uzniq n 120 n tnezduɣin tiɣri i tikkelt-nniḍen i yimḍebbren teεna temsalt i tifrat n uɣbel-agi n unfel n waman yumsen (azuliɣ) ɣer tnezduɣin-nsen s lemɣawla, akken ad kfun wurfan n telḥit deg yiɣdir d uzuliɣ, d useḥbiber ɣef tdawsa tazayzayt n yimezdaɣ.
Ali Zalouk