Yal mi ara d-tezzi tallit n tleqqaḍt n uzemmur di Tmurt n Yiqbayliyen, tettawi-d yid-s ugur i icudden ɣer twennaḍt iwumi ur d-ufin, neɣ ur smersen, wat lmaɛesrat, tifrat iwulmen. Ugur-a d amurej-nni yakk i d-ttḍeggirent tessirin n uzemmur ɣer lexlawi d yisaffen send tigawt n uɣɣad d uẓẓam n yiɛeqqayen n uzemmur. Deg usamar n Bgayet dɣa, aṭas i d-inebbhen ɣef twaɣit-a takulujit i yettḍurrun tawennadt, abeɛda Asif Ugeryun, garasen tiddukkla « Oxy-jeunes » i usnerni d uḥraz n tgemmi tagamant d tmezrayt n Yiderginen.
Tura tddukkla-a ɣef umihi i dyessegray umurej-a ula i Tenmehla n twennaḍt n Bgayet d semmus n tɣiwanin n usamar n twilayt-a i yellan d Ayt Smaɛel, Tasexriwt, Xerraṭa, Iderginen d Suq Letnin. « Llant ugar n 400 n lmaɛesrat i iqeddcen di twilayt n Bgayet. Yeqqard umḍan-a tixuttert n tgemmi tazemmurant i tekseb Bgayet, imi tettwasesmel, ɣef wakken yella di leḥsabat n uɣlif n tyerza, d tamezwarut s wudem aɣelnaw. D acu kan, amḍiq-a mačči war uguren, meskud armud n lmaɛesrat yesnernay-d iḍumman i yettḍurrun tawennaḍt d umdan.
Yal tallit n tleqqaḍt, ssuggutent lmaɛesrat aɣɣad n uzemmur d uḍegger n yiḥemmalen n umurej yal ass, i yettarran srid ɣer ugama (…) », d kra i nezmer ad nɣer di tebrat-nni. Tewwi-d daɣen tddukkla-a awal ula ɣef uɣilif n tɣuzi i d-yezgan meqrub isaffen. Tefka-d rray n tɣuzi n yimdunen n usizdeg akken ad yettwaskaf umurejnni, ad teffɣen akkin ala waman yesfan. Tatiknikt-a, ad tesqam i bab n lmaɛesra anagar 20 000 n yidinaren.
Ilaq ad d-nini ma yella tesṭeɛref tussna s tigawt-a, ihi yezmer ur bɣin kan wat lmaɛesrat ad serrfen idrimen deg ubnaw n yimdunen-a, ulamma taluft-a d tuzribt, terza tawennaḍt, terna amdan. Ɣer taggara, tessumur-d tddukkla « ad ttwaceyyaɛent tebratin n uḥettem i wat lmaɛesrat iweɛren sɣur yiqqeddicen iɣiwanen n tezdeg yemgaraden n twilayt n Bgayet ».
M. K.