Tahanouts, d yiwet gar 23 n tuddar n tɣiwant n Ait Aissa Mimoun, i d-yezgan deg ugafa n tɣiwant-agi u deg ugafa n lwilaya n Tizi Uzzu. Tebԑed ɣef temdin-a s wazal n 14 n yikilumiṭren. Taddart-agi, mazal ar ass-a n wussan tedder aṭas n yiɣeblan d wuguren, imi tuget n yisenfaren n unegmu i tt-d-iṣaḥḥen, wa mazal ur yekfi ara, wayeḍ mazal maḍi urεad yebdi, wayeḍ, wayeḍ… Gar yisenfaren yebdan yakan, u mazal ur kkfin ara, ad d-nedder tikkelt-agi : Asenfar n unnar n Sidi Slimane, i d-yezgan deg usammar n taddart-a, tama n tmeqbert. Asenfar-a, bdan yimuhal-is deg taggara n useggas n 2013, ma d tadrimt i t-id-iṣuḥḥen lqider 560 n yimelyunen n sentim, aql-aɣ qrib d taggara n useggas n 2020, yerna mazal ur yekfi ara. Mbeɛd ugar n sin n yiseggasen n uḥbas s wudem unṣib, n uxeddim deg unnar n ddabex uḍar, tuɣal-d tkebbanit i t-yeṭṭfen ɣer uxeddim. Azal n ddurt-a, segmi i d-uɣalen s axeddim, dɣa bdan ttawwin-as-d ayen i d as-ilaqen. Niqal uɣalen-d ɣur-s s axeddim, dɣa bnan-as-d sin n leḥyuḍ, yiwen ɣer tama tayeffust, wayḍ ɣer tama taẓelmaḍt. Rnan diɣ, ssuffɣen-as aman ɣer tama n usemsawi-ines amacemma. Mbeɛd mi teḥbes tkebbanit-a ɣef lxedma, ɣef ssebba n usmutti (aswexxar) n yiwen upuṭu n trisiti deg yiwet n teɣmert n unnar-a, imi iqerreɛ akemmel usewseε-is i wacḥal n wagguren. Syin akkin uɣalen, usan-d yixeddamen n Sonalgaz n Ouaguennun i wakken ad kemmlen ad ksen apuṭu-nni, maca bɣan ad sɛeddin lexyuḍ deg tlemmast n unnar, dɣa uggin yimezdaɣ n taddart-a. Xas yella-d uswexxar n upuṭu-nni, meɛna ur d-tuɣal ara tkebbanit-a s axeddim armi d ddurt iɛeddan. Ɣer taggara n unebdu-a, yetturaǧu ad isellek unnar-agi n Sidi Slimane, ara yesɛun 45m di tehri ɣef 90m di teɣzi. Ad yettwaxdam s rrmel n sseḥra, win iwumi qqaren ltif. S wakka, ad d-yuɣal usirem i yimezdaɣ n taddart-agi, ladɣa i lmeẓyen i t-yettraǧun s ccuq.
Aheggi n unnar n ddabex i tɣiwant
Ula d taɣiwant n Ait Aissa Mimoun, uɣur tettekki taddart-a, tettheggi-d amkan anda ara tesbedd annar aɣiwan amaynut. Yettili-d akka tura aheggi n yiwen umkan deg taddart n Akaoudj, ideg yetturaǧu ad d-yili unnar-agi aɣiwan mbeɛd winna n Tiplakine. Imi annar-agi, mazal-it kan d asenfar, i yetturaǧun ad d-yeffeɣ sɣur Tenmehla n Yilmeẓyen d waddal (DJS) n Tizi Uzzu. Annar-agi, yetturaǧu ad iqader akk ilugan n unnar n ddabex uḍar : Teɣzi, tehri…atg. Ula d annar-agi, ma yella-d ad d-yernu afud i uḥruc n waddal deg tɣiwant-agi. Amek wakken, ara yessebɣes ilmeẓyen n tɣiwant-a akked tddukkliwin n waddal akken ad xedment ugar. Imi mazal taɣiwant n Ait Aissa Mimoun, ur tesɛi ara annar aɣiwan aḥeqqani, imi winna n Tiplakine d ameẓyan nezzeh.
Adaoun Abdelghani.