Tettuneḥsab temdint n Wehran gar temdinin meqqren wessiɛen deg umalu neɣ di tmurt s umata, ama deg lebni, deg yiberdan, deg tsuddwin d wayen-nniḍen.
Rnu ɣer waya, imi aql-aɣ nettidir di zzman ileḥḥun simmal ɣer sdat deg yiwet n tudert tamirant, aya yefka tagnit i qrib yal amdan ad yesɛu takerrust i yiman-is. Annect-a igerrez, maca a win yufan iberdan wessiɛit, qeɛden, imdanen ad ttqadaren iṣuḍaf.
Annect-a merra d asirem, acku deg Wehran d tamdint yettidiren di zzḍiḥ d zzhir n yal ass, ṣṣbeḥ tameddit, rnu ɣur-s iṣuniḍen, isuɣan d umseččaw swayes i d-igellu leḥris-a. Ɣef waya, yeffeɣ-d yiwen n uṣenfar n lebni n 4 n yirasuyen (tunnels) meqqren, ad ilin deg yimekwan ideg yuget waṭas n zzhir, ad ttwabnun deg wammasen yettwassnen anda ddawarent, am yiɣrem (cité) Ǧamal, Lmurcid d Lbahya.
Aṣenfar-a, d asirem akken ad yenqes s tidet leḥris-a i ttidiren yinehharen n tkeryas, ur seɛɛun ara uguren deg uxeddim-nsen, u ad ttuɣalen di laman ɣer yixxamen-nsen timeddiyin n wass. Maca ugur i d-yezgan imir-a i beddu n uṣenfar, d tidersi n tedrimt ara iqadden i ccɣel-a, ɛlaḥsab n yiwen gar yimasayen n twilayt i d-yemmeslayen, yenna-d : «Ur yezmir ara ad yebdu uṣenfar am wa deg wussan-a yakan, acku tamurt ur terkid ara akken yessefk».
Ɣef umeslay-is ihi ilaq ad nerǧu melmi ara terked tmurt, i wakken ad walin yimdanen ttwabnan yiṣenfaren, ttemhazen lecɣal ɣer sdat. Wissen ma d targit, neɣ d asirem, neɣ d tidet ad tgerrez teswiɛt.
Khaled Achoui