Accueil Tamazight Yettwaker ucennay Ɛmiruc

Yettwaker ucennay Ɛmiruc

88
- PUBLICITÉ -

Mazal asaru n ugdal n umeslay d userheb yettkemmil deg Lezzayer. Seld qrib aggur segmi yettwanɣa umeɣnas amẓabi Kamal Fexxar s tarrayt tarusridt di lḥebs.

- PUBLICITÉ -

Teḍra-d deg yiḍ n 14 yunyu yezrin teqsiḍt-nniḍen yeǧǧan aṭas n yimdanen di lḥir. D acennay aqbayli Ɛmiruc i yettwaṭṭfen s tuffra sɣur yiwet n terbaɛt i t-id-iḍefren deg ubrid-is s tkerrust, mi d-yuɣal seg tmeɣra n ccna anida yettwasnubget ad yecnu i lfayda n uqcic amuḍin Sami Djerrahi deg tama n Ginduz deg Yiɣil Ɛli.

Akken kan i d-yeffeɣ yisali n tukerḍa n Ɛmiruc, aṭas n Leqbayel ur rkiden ara, kra ruḥen s axxam-is deg Tubiret, kra-nniḍen ɣer wadeg anda teḥbes tkerrust-is d tilemt, nudan akk tiẓgi-nni, ulac acu ufan. Almi d azekka-nni ṣṣbeḥ i d-yella userreḥ-ines sɣur wid i t-yewwin, imi ẓran aṭas n Leqbayel i d-iɛewwlen ad nadin fell-as, u ma yella wacu yeḍran yid-s iban ad yili kra.

Akken i d-iban unaẓur Ɛmiruc i tikkelt tamenzut mbeɛd tukerḍa-ines, iban-d yeɛya mliḥ, yettwajreḥ deg waṭas n tamiwin n tfekka-s. Ɛmiruc yettwassen s tezlatin-is timḥaddiyin seg yiseggasen n 90 ɣef taluft n teqbaylit. Taggara-a, yessuzur-d tividyutin srid deg usebter-ines n Facebook, deg-sent yettmeslay-d ɣef yimal n tmurt n Leqbayel d ubrid yelhan ideg tezmer teqbaylit ad d-tessukkes iman-is seg tuccar n temḥeqranit.

D aya ahat i yeǧǧan wigi ad t-ṭṭfen, imi walan annect-a uɣur i d-yessawal d amihi ɣef Lezzayer d tdukli-ines. Ɣas akka agdud taggara-a yeqqar-d ayen yebɣa d wayen iwala s tlelli war tugdi seld tuffɣiwin i d-yettilin. Maca ayen yerzan taqbaylit d tumast tamaziɣt, mazal yettili-d ugdal n umeslay fell-as. Taneggarut, d inaw n uneɣlaf n temḥaddit ɣef ugdal n urfad n ssenǧaq amaziɣ di tikliwin n lǧemɛa !

Kh. A.

- PUBLICITÉ -