Tenhez lwilaya n Tizi Uzzu d tmurt n leqbayel s umata s yir isalli yesseḥzanen yessewhamen i d-yeɣlin imalas yezrin s tmettant n yiwen n yilemẓi. Tamettant n yilemẓi-a, tella-d s tmenɣiwt, dɣa d ayagi i d-yessegran lɣiḍ d tugdi ɣef yimezdaɣ, acku mačči d tikkelt tamezwarut, mačči d tis snat ara d-teḍru tigawt qeṣṣiḥen yecban tagi deg twilayt n Tizi Uzzu. Ilemẓi-a, yettusemman R. B, deg leɛmer-is anagar 26 n yiseggasen, yettwanɣa s tyita n rrṣas, yettwufa daxel n tkerrust-is iɛum deg yilel n yidammen, deg umkan iwumi ssawalen Tala Ulili, kra kan n yikilumitren ɣef wanda yezdeɣ deg tama n Bunuḥ, asun n Buɣni. Ufan ɣer tama-s, ameddakkel-is yeddan yid-s yeḍleq d amejruḥ deg waddad iweɛren. Ma d wid i ten-yewwten, ɣef telɣut i d-yewwḍen, d takerrust-nniḍen i d-rekben akken d agraw, gan ccɣel-nsen send ad rewlen syin. Imsulta seg tama-nsen, ldin tasastant akken ad d-skeflen iẓuran n tedyant-a. Annect-a, ad yeǧǧ tugdi ad d-ters deg tamiwin yexlan seg yimezdaɣ, “Ilaq ad ɛassen yimdanen d yimsebriden iman-nsen, amzun deg yiseggasen-nni n rrebrab ideg i nella, nessutur talwit d lehna di temnaḍt-nneɣ, ur nebɣi ara ccwal ad iḥer tilisa ”, i yenna yiwen n urgaz ɣef tedyant-a.
Kh. A.