Accueil Tamazight Yettwasbedd uselway amaynut n tɣiwant

Xeṛṛaṭa

Yettwasbedd uselway amaynut n tɣiwant

27

Am twilayin akk n Lezzayer, teṭṭef tsertit amdiq-is deg tudert n yal ass n yimdanen, ladɣa segmi i d-yekker ugdud. Dɣa, am win yellan yakan yettabeε-itt, am win yexḍan seg-s, uɣalen akk medden d isertanen. D aya i yeḍṛan di tɣiwant n Xeṛṛaṭa, imi yeṭṭuqet umeslay ussan yezrin ɣef liḥala i tettidir tɣiwant-a. Ladɣa segmi i yeṭṭaxeṛ Saεid Ḥamamin i yellan d aselway n tɣiwant-a seg umḍiq-is ass n ,31 di meɣṛes 2019. Seld aya, imḍebbṛen n tɣiwant-a, akked wid teεna temsalt nnejmaεen i wakken ad d-afen tifrat i temsalt-a. Dɣa, akken i d-yeqqaṛ uṣaḍuf, ma yella iṛuḥ uselway n tɣiwant, d yiwen seg urbaε-is ara yeṭṭfen amkan-is. Ad d-nesmekti d akken, agraw-nsen d agraw n yilelliyen, rnu i waya, d nutni i yesεan ugar n tuɣac. Γef waya i sbedden Mass Fennuc Reḍwan deg umkan n uselway aqbuṛ. Ayagi, yella-d deg uxxam n tɣiwant, sɣuṛ uselway n tdayṛa, i d-yusan deg umkan n lwali, d yixeddamen n tɣiwant, akked yimezdaɣ-is. Ɣef leḥsab n teɣbalut-nneɣ, aselway-a amaynut, yefka-sen awal i yimezdaɣ belli ad yexdem nnig n tezmert-is i ubaɣuṛ n tuddar n tɣiwant meṛṛa. Yerna ad yeεṛeḍ ad iqeεεed ayen deg wacu ideg xuṣṣent seg yal tama, ama d tin n waman n tissit d tdamsa s umata, neɣ d tin n usegmi d tiyaḍ. Lameεna ayagi, ɣef leḥsab-is, ad d-yili s ufus n tallelt n at tuddar d lebɣi-nsen i ubeddel.

K. K.