Simmal tettnerni tsekla tamaziɣt, simmal tteffɣen-d yidlisen imaynuten, skud llan wid yesɛan lebɣi n tira, d wid yefkan azal i tira s tutlayt-nsen, akken idles-is ad yeffukti, ad yenǧer ubrid i tira. Akken, diɣ, ad d-afent tsutwin ara d-yekkren agerruj s tutlayt-nsen, deg ubrid-is ad kemmlen. Taggara-a ladɣa, aṭas n ufaris amaynut i d-yettlalen, d tamedyazt neɣ d idlisen. Ayen yeṭṭfen amkan s waṭas d ungalen , yal wa ɣef wanwa asentel i d-yewwi umeskar-is. Dɣa ass n 19 tuber iɛeddan, i d-yerna wungal amaynut n uselmad n tmaziɣt Mass Belɛidi Lyes abaɣur-is i tutlayt n yimaziɣen, d ungal iwumi yefka asentel “Yezger asaka”. yeffeɣ-d ɣer teẓrigin Imru, i d-yessiẓrigen tineggura-a ddeqs n yifarisen s tutlayt n tmaziɣt.
Bla ccek d ungal ideg ara yili ubaɣur deg tsekla, idles d tutlayt, ma neẓra belli d afaris amezwaru n umeskar, rnu d win iwumi yefka akud uqbel ad t-id-yessiẓreg. Iban ad yehwu i yimeɣriyen, deg-s ad d-skeflen kra n lesrar n tmeddurt d tmetti. Adlis imir-a, ad t-naf deg tnedlisin n Tizi Uzzu, send ad yaweḍ deg wussan i d-iteddun ɣer Bgayet d Tubiret. Ma nuɣal-d ɣer umaru, Lyes Belɛidi, d aselmad n tmziɣt deg tesnawit Xewwas Ḥsen deg tama n Larebɛa Nat Yiraten. Yura yakan kra n tullisin, kra n yimagraden (tazrawt ɣef wungalen) i yisebtar n Uɣmis n yimaziɣen, d aɛeggal imsuddes n tesɣunt Aselmad i d-yetteffɣen deg internet. Yewwi arraz wis kraḍ deg temsizzelt n tullisin n tesbeddit takanadit Tiregwa, arraz wis sin deg temsizzelt n tullisin i d-tettheggi tddukkla tadelsant Adrar n Fad. Nessaram ugar n wafud i umeskar n wungal, d tɣuri yelhan i wid ara t-yeɣren.
Kh. A.