Accueil Tamazight Yir tudert n Cherif Lasheb

Ajdid deg tira

Yir tudert n Cherif Lasheb

57

Yir tudert, d ammud n yisefra n umedyaz Cherif Lasheb i d-yeffɣen, agguren yezrin, ɣer tezrigin Tamagit. Deg udlis-a n 64 n yisefra, yennul umeskar, deg-s, qrib akk isental i icudden ɣer tmetti, yecban tawennadt, tasertit, tameṭṭut, uguren n tmetti, temɣer, tayri d wayen-nniḍen i t-iceɣben netta s timmad-is neɣ i iḥuzan imdanen-nniḍen imi ɣef wakken i d-tenna, yelli-s, Laeticia, deg tezwert i as-texdem i wammud-a.

« Yir tudert, mačči d ayen kan i yesɛedda netta, maca yewwi-d isefra ɣef wayen ttidiren wiyaḍ am ssekran, tidderwect, amɣar, taqendurt…atg ». Mi ara iɣer yiwen isefra n Cherif Lasheb, ad as-d-iban later n jida-s i yuɣen aẓar deg wallaɣ-is. Jida-s i yellan tettawi-d isefra ɣef wuguren n tmetti, tibuɣarin deg tmeɣriwin akked yisefra n lemdeḥ deg lǧanazat.

Akka ara naf awal n sswab, yufrar-d s waṭas deg yisefra n umedyaz akked yiwellihen yeqqnen ɣer ddin s umata, xas ulamma llant, yakan, kra n tektiwin i yeǧǧa wakud, yecban tamuɣli-s ɣef tmeṭṭut n tura d wayen-nniḍen. Acu kan, ad yeqqim waya d rray-is akked tmuɣli-s netta. Gar yisefra i d-yessizreg, imi aṭas i as-mazal, ɣef wakken i t-id-yenna, ad d-nebder Lxir, Axxam, A gma, A ssaɛd-iw, Arruḥ ajqayan, Lexdeɛ, Taggara n umcum, Beddeɣ di ttewḥid, Ibeddel zzman…atg. Ilul Cherif Lasheb deg useggas n 1973 deg Tala Xlil, taɣiwant n At Dwala. Zyada ɣef wammud-agi n yisefra, yebda la yesuddus tizlatin. Am wakken yessuli, yakan, yiwet n tmezgunt. Yettnuz udlis s 250 DA, ɣur-s 120 n yisebtar. Taɣuri igerrzen.

H. M.