Mebla ccek, aṭas n taɣulin i d-ijebden amdan akken ad tent-iḥemmel, s yis-sent ara yesɛedday lewqat-is ilmawen. Llan wid i ijebbed waddal, akken llan wid i thewwu taɣult n ccna d uẓawan. Ula d tira tewwi amur-is seg wid iḥemmlen imru. Tella yiwet n taɣult-nniḍen, akken i d taqburt, akken i mazal azal-is deg tudert tatrart. Ssinima, d yiwen n umkan i d-ijemɛen imdanen, meqqer neɣ meẓẓi, d argaz neɣ d tameṭṭut, seg wid i yewwi usugen n yisura i d-yettnulfun d imaynuten neɣ ɣas ula d wid yellan d iqburen, acku d adeg ideg ara iḥuss umdan s usteɛfu n wallaɣ. Ɣas ma yettḍafar tigawin n usaru, meɛna tigawin-a, ad t-ǧǧent ad yidir asinaryu s lqerb, neɣ am wakken d aɛeggal gar yigensasen-is.
Tamdint n Wehran akken i meqqer umezruy-is, akken i yeṭṭef uḥric n ssinima aṭas n yimekwan, imi d yiwet n temdint iɣef i d-ɛeddan waṭas n leǧnas d yimnekcamen, am Iṭerkiyen, Spenyul d Yirumyen. Bnan ixxamen n ssinima s tuget, d ayen i t-yerran d yiwet seg tgejgda n yidles. Acu kan, deg lweqt-a amiran, yuder-as nezzeh wazal i uḥric-a n ssinima di temnaḍt-a, ggran-d ddeqs seg yixxamen-a imazrayen d ilmawen, d ixerban, yuli-ten uɣebbar. Yella wanda uɣalen, ɛad, d idgan n temliliyin n wid ur nesɛi ccɣel. Armi taggara-a uɣalen yixxamen n ssinima n Wehran ččuren d lewsex seg tsegray n tissit d wayen-nniḍen.
Ma d timental mačči d yiwet, ahat imi deg lawan-a qwan wallalen atraren n tetiknulujit i yerran imdanen ad dhun d umaḍal atrar u ad ǧǧen imeḍqan-a insayenen yesɛan azal ameqqran deg yidles amatu n umdan. Llant ssebbat-nniḍen, d astehzi n tejmayɛin tidiganin i yeǧǧan imekwan-a ad asen-truḥ lqima. Deg Wehran, kif kif-itent tmental, ɣef wakken i d-iwekked yiwen n umasay aqdim di tɣiwant n Wehran, d imasayen n yidles d wid n tɣiwanin i yefkan afus armi tuder taɣult-a. Yenna-d daɣen belli segmi uɣalen yidgan-a gar yifassen n yimɛellmen i ten-yuɣen s udrim seld mi llan sselḥuyen-ten ssrabes n tɣiwant akked umaris aɣelnaw n yidles d uselɣu, ma d imɛellmen-a ur llin ara d imawlan n ssinima. Rebɛa kan n yixxamen n ssinima i d-yeqqimen leḥḥun, mbeɛd mi llan zik d imeyyaten, wigi llan deg tlmemast n temdint, am tzeqqa Es Saɛada, El Fatḥ, Merǧaǧu akked El Maɣreb.
Tiyaḍ, anagar isem i d-yeqqimen deg-sent, ɣas azal-nsent deg umezruy meqqer. Annect-a, yeǧǧa aṭas n yimdanen iḥemmlen ad rzun ɣer ssinima ad sḥasfen ɣef wudem i deg i d-yegra uḥric-a d wanda yewwed deg temdint meqqren am Wehran, yettwakkes ama i yimawlan, ama i tarwa-nsen wadeg adelsan iḥemmlen ad ssezrin lewqat-nsen u ad sbeɣren cwiṭ timussniwin-nsen deg unnar-a.
Kh. A.