Accueil Tamazight Zrin 18 n yiseggasen ɣef tikli tameqqrant n Leqbayel

Asmekti n tefsut taberkant

Zrin 18 n yiseggasen ɣef tikli tameqqrant n Leqbayel

22

14 yunyu 2001, neɣ tikli n Tefsut taberkant, d ass ideg ffɣen Yeqbayliyen deg tikli ɣer Lezzayer tamanaɣt.

D ass anda ruḥen wazal n sin neɣ tlata n yimelyan n yiqbayliyen ɣer tselwayt n tegduda i wakken ad ssersen Tiɣerɣert n Leqser i yellan d aḍris yessuturen tugdut, izerfan n umdan akked tmagit. Acu kan, adabu ur ten-yeǧǧi ara ad awḍen iswi, imi i asen-d-ihegga deg ubrid-nsen, imcumen-is i asen-igan tawaɣit s ddaw leɛnaya n yiɣallen n laman. D tikli ara yeqqimen deg umezruy i lebda. Tikli-a, tamelwit i ixedmen Yeqbayliyen mgal adabu ameṣbaṭli, tuɣal d annar n umennuɣ gar yilemẓiyen d yiqeddacen n yiɣallen n laman.

Tegla-d Tefsut tabertkant s temda n yidammen, deg-s ɣerqen warrac. Mmuten ugar n 127 n yilemẓiyen, ttwajerḥen ugar n 3000 deg-sen, mebla ma nettu wid i d-yeggran d imeεḍaṛ i lebda.

D azemz ara yeqqimen deg wul n yal Aqbayli, acku ulac tawacult taqbaylit i iselken seg leqṛiḥ n tyita, imi jeṛḥent tasiwin n tyemmatin, ttrun yibabaten idammen. Ffɣen warrac ass-nni i wakken ad ssutren izerfan-nsen iṛuḥen, i llan ssuturen seg Tefsut n Yimaziɣen 1980, ladɣa tamsalt n tutlayt d yidles amaziɣ i yeqqlen di rrif deg tmurt n Masensen. Mebla ma nemmeslay-d ɣef temḥeqṛanit n udabu ameṣbaṭli i yekksen i Uqbayli izerfan-is n uxeddim, n tlelli n umeslay, n yidles, n tɣuṛi, d waṭas n temsal-nniḍen. Ayagi imi bɣan tamurt, ad tili d taεṛabt d tineslemt. Rnu i waya, ula d tamettant n yilemẓi Masinisa Germaḥ deg At Dwala sɣuṛ yiǧadarmiyen ass n 18 yebrir 2001, terna tecεel times deg wulawen n Yiqbayliyin, i yugin ad knun i ddel, imi si zik Amaziɣ yettwassen d akken d mmi-s n tlelli.

Ass-a, 14 yunyu 2019, εeddan 18 n yiseggasen segmi faqen Yeqbayliyen s tkerkas d txubbta n udabu. Tura ɣas ukin-d ula d wiyaḍ seg nadam-nsen, lameεna ulawen d wallaɣen, ad qqimen akked yimeɣṛaṣen n Tefsut taberkant, d Tefsut n Yimaziɣen.
K. K.