Iḍelli i d-zzin 19 d aseggas ɣef tikli tameqqrant i gan yiqbayliyen ass n, 14 deg yunyu 2001. Tikli i d-yellan mbaɛd tiwaɣiyin i yeḍran seg 18 deg yebrir 2001 d tasawent. Seg wass-nni mi yettwanɣa Guermaḥ Massinissa armi neqqḍen yiǧadermiyen ugar n 128 d ilemẓi u ttwajerḥen azal n 5 000 nniḍen. Swejden-d tikli-a ɣer Lezzayer tamanaɣt, wid yellan ɣef uqerru n Umussu n Leɛrac. Ass-nni, qeccuc meccuc, ṭṭfen abrid ɣer Lezzayer tamanaɣt : Yal wa d ttawil n tumnayt i t-yewwin ; llan wid i tt-yeṭṭfen ula ɣef uḍar, imi akken qqaren ‘’Laɛtab ur t-id-nettader’’, awi-d ukan ad tili tririt ɣef wayen yesutur Umussa-agi deg Tɣerɣert n Leqser i d-yesdduklen i tikkelt tamezwarut amur ameqqran n yiqbayliyen, uqbel ad yeftutes am tɛeqqayen n ṛremman. Ass-nni n, 14 deg yunyu 2001, tergagi tmanaɣt uqbel tiwḍin n yimesbaniyen. Seg wakken yugad udabu, yesexdem akk tikerkas-is i wakken ur keccmen ara yiqbayliyen ɣer tlemmast n tmanaɣt. Yesrkec-d u yeseḥrec-d s kra yellan d yir amdan ɣef yiqbayliyen i yewwḍen timezwura. Syin, yeḍra ubaxix gar yimdanen, yegla uzegzaw s uquran. Awi-d kan ad d-yeslek umdan iman-is gar lummas, ijenwiyen d lakrimujan. Ɣelqen yiberdan, tekker deg yal amekkan, d tuɣalin kan i d-yeqqimen. Ur telli tririt ɣef Tɣerɣert n Leqser, ur yelli unekcum ɣer Lezzayer tamanaɣt. D asḥessif i d-wwin d aɛwin wid yesɛan zzher ulac acu i ten-iḥuzan. Ruḥ a zzman, rwaḥ a zzman, uɣalen leɛrac-nni yugin ameslay, ferqen am yirden ɣef lluḥ : Kra, ruḥen ɣer umeslay, kra ugin-t, ckunṭṭḍen kan deg tɣerɣert-nni. Wiyaḍ, teɛreq-asen, ḥeṣṣlen gar yiccer d uksum. Ar ass-a, yal awa yeqqar ‘’d ibawen-iw i yettewwan’’. Qqaren : ‘’Newwi-d aya d waya’’. Wiyaḍ, nnan : ‘’Nezmer ad d-nawi ugar lukan nkemmel’’. Ineggura, walan d akken idammen n yilmeẓyen yugar yal taɣawsa.
Hocine Moula