Accueil Évènement Ḥebsen ɣef leqraya yinelmaden n ugezdu n trumit

Tasdawit Mulud Mɛemmeri n Tizi Uzzu

Ḥebsen ɣef leqraya yinelmaden n ugezdu n trumit

42

Mbaɛd aneḥbus n yinelmaden n ugezdu n tutlayt n trumit i idummen azal n 15 n wussan, ussan-nni iɛeddan, a-t-an yuɣal-d i tikklet-nniḍen, imi aɣbel ur yefri ara gar yinelmaden akked wid teɛna temsalt.

Ḥebsen yinelmden n ugezdu ɣef leqraya ddurt iɛeddan u ɣelqen tadbelt n tesdawit. Yebda usunded mi i d-yekcem yiwen umdan ur nelli ara d anelmad ɣer yiwet n tesmilt, syin yennuɣ akked uselmad, ayen i d-ixelqen tugdi ɣer tnelmadin. Ad nwekked d akken ilemẓi-a, ur yelli ara d anelmad di tesdawit. ‘’Tekka-d tucḍa seg yiɛeggalen n laman n tesdawit akked wid n ugezdu imi ur xeddmen ara axeddim –nsen akken iwata.

Win tufiḍ ad d-yekcem ɣer tesdawit, ad yekkes sser ɣef tesdawit i irefden isem n yiwen umeqqran’’, i aɣ-d-nnan yinelmaden. Tebda yir liḥala n laman deg ugezdu seg wasmi i yebda useggas aɣurbiz. Nesteqsa yiwen seg yiɛeggalen n teseqqamut n yinelmaden n ugezdu, a-t-an d acu i d-yenna : ‘’Ufan-d iman-nsen yinelmaden deg tugnatin ur ngerrez ara, imi zgan yiberraniyen deg ugezdu, d ayen i d-yettawin iɣeblan’’.

Anekcum-agi n yiberraniyen, mačči kan deg ugezdu n trumit i yella, maca di tesdawit merra, imi tawwurt n tesdawit, telli win tufiḍ ad d-yekcem. Anect-a, d ayen i d-ixelqqen cwalat gar-asen akked yinelmaden.Tikkwal d ayen i yettɛewiqen timsiren. Mbaɛd asunded i xedmen yinelmaden n ugezdu n trumit, rran-asen-d tiɣri wid teɛna temsalt: Ssḥarsen iɣallen n laman deg ugezdu, maca wissen ma yella d ayen ara idummen, neɣ d aɣebbar s allen.

Tamsalt n yimenɣi, teɛna akk tisdawiyin n tmurt merra. Taqsiḍt yeḍran deg Ɛennaba, deg Lezzayer tamanaɣt neɣ Sṭif d wanda-nniḍen, tessebgan-d aswir n twaɣit uɣur wwḍen yinelmaden, deg wass yecban ass-a. Mačči d yiwen neɣ d sin yimedyaten. Ad d-nebder kra kan. Wagi d yiwen n unelmad i d-yusan si tmurt n Zimbabwe akken ad ikemmel leqraya-is dagi di tmurt n Lezzayer.

Ddurt iɛeddan, yettwawat, yettwanɣa sɣur yiwen n yilemẓi imi i t-yewwten s lmus. Akken i d-yules umeddakkul-is, belli yettwawet, yeɣli di lqaɛa, yerna ulac win i d-yusan ɣur-s akken ad t-yawi ɣer sbiṭer. Yeḍra-d wanect-a di lwilaya n Ɛennaba. Tikkelt-agi d anelmad n Burǧ Buɛririj i yettwanɣan deg tnezduɣt tasdawant n Benɛaknun. Mi d-yekcem ɣur-s yiwen, yewwet-it, yenɣa-t.

Yenna-d unemhal n tnezduɣt tasdawant: “Wagi i t-yenɣan, d ameddakkul-is, i yebɣan ad as-yakar takerrust-is. Mbaɛd mi yexdem taxezzabit-agi, yeɛreḍ ad yerwel s ṭunubil-nni, maca ur teǧǧin ara yiɣallen n laman n tnezduɣt. Tayeḍ-nniḍen, teḍra-d di tnezduɣt tasdawant n tesdawit n Ṣṭif, mi tettwawet yiwet n tnelmadt s lmus s udem-is sɣur tayeḍ, akken i d-nnan.

Yamani Souhila