I lmend n Yennayer, yessufeɣ-d unaẓur Yasin Zwawi yiwen n uqeddic asinimatugrafi amaynut ideg yerra tajmilt i yiwen seg yisulas n ccna azwaw, Sliman Ɛazem, d tmeṭṭut tazzayrit i yennuɣen di tegrawla mgal Fransa. Akken i aɣ-d-iberreḥ umeskar, d aqbur cwiṭ usenfar-a, imi d-tlul tekti deg useggas n 2016 yakan. Ulamma tikti n uɛiwed n tezlit « Tasekkurt » tlul-d di 2010, mi t-tewwi yiwet n tirza ɣer tmurt n Kanada s tennubga n tesbeddit Tiregwa. Yenna-d Yasin Zwawi, d Racid At Ɛli Uqasi i as-d-yessumren ad tt-iɛawed, armi d-teffeɣ dɣa deg 2014 deg uḍebsi « Laman ». Syin ɣer da, tlul-d tekti n usaru-tizlit asinimatugrafi gar-as d umsufeɣ Tufiq Gellati. Dɣa, seg useggas n 2016 i yebda iqeddec deg-s, armi d-yeffeɣ deg yixef n useggas-a n Yimaziɣen 2969. Ayendin d tilufa yeqqnen i umezruy n tegrawla n Lezzayer i nezmer ad d-nissin seg uklip-a n 11 n temrac d 12 n tsinin, imi d-yefren unaẓur akked umsinaryu, turart n kra n tegnatin i d-yesbegginen cwiṭ seg wayen tesɛedda tmeṭṭut. Ɣef wawal n Yasin Zwawi, yefren ad d-yessufeɣ aklip-a lawan-a gedged ɣef waṭas n tsebbiwin, gar-asent amulli wis meyya n tlalit n Sliman Ɛazem akked tfaska n Yennayer n 2969. « Leqdic-a asinimatugrafi amaynut, nenwa nekk d umsufeɣ Tufiq Gellati ad t-nbudd d tarzeft i yakk Iqbayliyen anda ma llan », i aɣ-d-iberreḥ unaẓur Yasin Zwawi. Send ad ikemmel: « Ayen i aɣ-d-yefkan afud, ayen i aɣ-d-yewwin tumert, d ameslay d usnemmer n medden mi walan leqdic-a. Ula d mmi-s n gma-s n Sliman Ɛazem, Brunu Ɛazem, yura-yi-d izen n usebɣes ».
M. K.