Accueil Évènement Tuɣal tejmilt i Ɛebdelqader Ɛellula

Udem gar wudmawen

Tuɣal tejmilt i Ɛebdelqader Ɛellula

44

Ɛebdelqader Ɛellula, yettuneḥsab gar wudmawen mucaɛen n yidles d tẓuri tis sebɛa ladɣa, imi d yiwen gar yimeqqranen i d-yeǧǧan agerruj deg taɣult-a n umezgun deg umalu n tmurt neɣ deg temnaḍt n Wehran. I lmend n usmekti n wass n tmettant-is, i d-yettuɣalen yal 10 deg meɣres n yal aseggas, yettwahegga-d leqdic s wazal-is, d asteɛref s wayen akk yeqdec d wayen i d-yeǧǧa deg unnar-a. Tajmilt-a, tebda s uskan n tewlaft-is meqqren deg tewwurt n Uxxam n umezgun yewwin isem-is, yettwaru deg-s “Ur ak-ntettu ara”, tettwaɛelleq ɣef teɣzi n yimalas, seg 9 ar 16 meɣres. Ma daxel n Uxxam-a n umezgun, llant tnagiwin (témoignage) sɣur kra n wid iqedcen yid-s deg yiseggasen-nni n 90. Mmeslayen-d ɣef wazal ila umdan-a di tmetti s umata, d taɣult n umezgun ladɣa. Nnan-d belli: “Ass-a nezmer ad d-nesfaydi s wayen akk i d-yeǧǧa wudem-agi i yidles. Aql-aɣ nettwali, tettili-d tira n yidlisen n umezgun n Ɛellula, akken daɣ i llant tid iwumi gan tasuqilt”, akka i d-yenna Mass Muḥemmed Bureḥla d Ziani Cherif, amsuffeɣ n tmezgunt (Arlukan) -ARLEQUIN- Valet des deux maîtres, d yiwet n tejmilt i as-rran s tceqquft-a dɣa ass n 16 meɣres ɣef 16h n tmeddit. Rnu ɣef waya, taceqquft El Aǧwad -Les Généreux- i yura yakan netta, yeɛni Ɛellula. D tamezgunt swayes i t-id-smektant snat n trebbuyaɛ ifazen i d-yerzan seg Tlemsan, deg Uxxam-a n umezgun amnaḍan i yellan ɣer tama n Umraḥ n yimrigen iwumi yettunefk yisem n Abdelkader Alloula seld mi t-yenɣa rrebrab. Ticeqqufin-a, yiwet tella-d ass n sed 9 meɣres ɣef 16h, tayeḍ ass n 10 ɣef 18h n tmeddit. D asmekti amatu n tmeddurt n Ɛebdelqader Ɛellula; d argaz n umezgun yettwassnen aṭas, ilul ass n 8 yulyu 1939 deg Ɣazawat, tama n Tala Yemsan, iɛac deg Wehran, iga leqdicat-is dinna, yemmut s tmenɣiwt ass n 14 meɣres 1994 deg sbiṭar n Val-de-Grâce deg tmurt n Fransa, mbeɛd mi yettwet s rrṣaṣ ass n 10 yulyu deg temdint-a n Wehran, mi yella ileḥḥu ɣer Uxxam n yidles ad yeg askasi. Gar wayen i d-yeǧǧa ; 9 n tmezgunin meqqren, gar-asent: El Khobza (Le Gagne Pain) 1970, Legoual (Le diseur) 1980, Attefah (Les Pommes) 1992. Yekki ma drus deg ṭam n yisura, am usaru (Combien je vous aime) n Azzedine Meddour, 1985. Yura yiwen n wungal ɣef tallit n tegrawla n Lezzayer (Le ciel est serein) 1989.

Khaled Achoui.