Tteffɣen yimezdaɣ n taddart n Teẓrut n Lbaz deg tɣiwant n buzgen taṣebḥit n yal taggara n ddurt deg waggur-agi n yennayer i wakken ad sizedgen taddart-nsen. D tiɣri n teseqqamut n tlawin n taddart iwumi i d-yerra yal amezdaɣ meẓẓi neɣ meqqer. Yal wa, ixeddem ayen iwumi yezmer, yal wa yefka-d ayen yesɛa.
Ddukklen yiffaden-nsen ɣef yiwen yiswi, i ten-yerḥan, wagi d aseḥbiber ɣef twennaḍt d usizdeg n Taddart-a i d-yewwin, yakan, amkan wis rebɛa di temsizzelt n taddart tazeddgant. Mačči dayagi Kan, maca heggant-d yiwen wahil s wazal-is, i swayes qublen asfugel n yennayer ass-nni n sebt, 12 deg yennayer 2019.
Yennayer d tiwwura n useggas imaziɣen. D ansay yellan deg waṭas n temnaḍin n tmazɣa.I lmend n lficṭa n useggas amaynut amaziɣ, terra tddukkla n tlawin n taddart n Teẓrut n Lbaz, azal mucaɛen i tikkelt-nniḍen i wass-agi amenzu n yennayer. Yettwahegga-d wahil d anesbaɣur. Gar wayen I d-yellan, ad naf, ccna, isefra d wayen-nniḍen. Akka, dɣa, i d-tewwi Lehna Azwaw yiwen n usefru ɣef yennayer.
Asfugel n yixef n useggas
Yeggra-d ɣer yimaziɣen ar tura
Yennayer yesɛa azal s lmaɛna-s
Ɛziz ɣef yimaziɣen n tmazɣa.
Ansuf s useggas amaynut
Ṭṭfen deg wansayen
Ad tneḥrez alamma nemmut
S imaziɣen ilelliyen
Ad nsuɣ s lğehd n ṣṣut
Yewweḍ-d wass ɛzizen
Yennayer ad yidir am tefsut
Tasa d way turew mlallen
D argaz neɣ d tameṭṭut
Ttheggin iman-nsen
Sewjaden isufar n lqut
D wayen yakk ẓiden
Taqbaylit, s lfeṭṭa d tqendurt
D lefwaḍi d waggus-nsent
Yennayer, ur yesɛi tatut
D yiwen deg wansayen
Cacnaq, ur-t-ntettu
Yesbedd di Maṣer tagelda n yimaziɣen
Ttxil-wen a y yinaẓuren, arut
D netta i yesseɣlin iɣallen iferɛunen
Ass-a, ad d-nemekti Masensen
D jeddi-s n Yugurten
D wid yakk yennuɣen
Ɣef yidles n yimaziɣen.
Lehna Azwaw