Yennulfa-d di cutembeṛ yezrin aseggas n 2018 yiwen n warraz s wazal-is, swayes ad rren yimheggiyen tajmilt i tmarut Yamina Mecakṛa, i yellan d tamsujit n tnefsit daɣen.Tlul Yamina deg useggas n 1949, temmut deg win n 2013. Tessuffeɣ-d adlis » La grotte éclatée » (1979) akked « Arris » (1999) . Rnu ɣef waya, arraz-a d asebɣes i kra n tmeṭṭut i ḥemmlen awal, i kra n tin yerran imru d ameddakkel, i tid yesseklasen tiktiwin-nsent ɣef tferkit, ssufɣent-d tayri d iḥulfan i yettidiren deg-sent. Ayen yessefṛaḥen ugar, d amenzay n warraz-a, acku d win ara d-yilin d uzzig ( spécial ) i tira n tmeṭṭut, neɣ s unamek-nniḍen d » Imru n tmeṭṭut « . Deg temsizzelt n teẓrigt tamezwarut, ffɣen-d yigemmaḍ ass n acer 20 di yennayer yezrin di Lezzayer tamaneɣt. Kṛad n tmaruyin i yeṭṭfen tacwawt, s kṛad n wungalen, yal yiwet deg tutlayt n tira-s: Kaysa Xalifi deg tutlayt n tmaziɣt s wungal-is » Iḥulfan » ; Ǧamila Talbawi deg tutlayt n teεṛabt s wungal-is » Ul n Uṣbelyuni » i d-yeffɣen di teẓṛigin n El Waṭan akked Hidya Benṣalḥi deg tutlayt taṛumit s wungal-is. » Ṛṛeεd » i d-yeffɣen di teẓṛigin Frantz-Fanon. Akken yeqqar yinzi » Akken tebɣuḍ teɣzifeḍ a yiḍ, d uleqṛar ad yali wass », ihi ayen yeẓẓa yiwen ad t-id-yemger. Ass-a tiḥeddadin n wawal megrent-d lɣella n uqeddic-nsent, ayagi, ad asent-yefk tazmert i wakken ad kemmlent abrid-nsent. Ad d-nesmekti d akken Kaysa Xalifi, tin i d-yufraren deg tutlayt tamaziɣt, tewweḍ leεfu n Yellu deg yunyu 2018, meεna ɣas agectum-is yekcem akal, tiktiwin-is mazal-itent ddrent, mazal ad idirent sya ɣer sdat. Xas akka, ulac-itt, maca ass-a tefka-d amedya i tmetti, d akken ur temmut ara, imi mazal anza n leqdic-is ɣef teqbaylit-is i tḥemmel ayendin yedder. Imeddukkal n Kaysa d wid i tt-iḥemmlen umren nezzeh, ayagi iban-d di tnaga-nsen. Ar taggara am neqqaṛ a tukyist kemm teddṛeḍ s wayen i aɣ-d-tessegṛaḍ, sgunfu di talwit a talwit.
K. K.