Aɣmis n Yimaziɣen: Awal s tewzel ɣef tezrigt-agi tis 13 n tmedyat?
Akli Outamazirt: D ttiɛad adelsan, i nxeddem yal aseggas. D timlilit ideg nettkemmil abrid-nneɣ n umennuɣ d leqdic. D tameɣra n tmedyazt d yimedyazen akked tmedyazin. Aseggas-a, newweḍ ɣer tedwilt tis 13 n temlilit n tmedyazt tamaziɣt d Ṣummam.
D acu-t umaynut n tezrigt-a ?
Amaynut ahat ulac mebɣir ma nuder-d tajmilt yettuɣalen. Akka am usggass-a, ad as-ner tajmilt i yiwen umedyaz ameqqran n teqbaylit, wagi d Ḥmed Laḥlu.
D acu-tt tiɣri-nwen i yimedyazen ?
Imedyazen a win yufan ilemẓiyen ad ttekkin s waṭas, imi tagnit teḥwaǧ ixulaf, teḥwaǧ aleqqem. Ma yella imedyazen ur d-ttasen ara, ladɣa imaynuten imeẓyanen, ad d-naf iman-nneɣ am wid i teddzen aman neɣ yesserwaten annar d ilem. Daymi i nessawal i yimedyazen i mazal yettkukrun, ur d-nban ara, i wakken ad d-ruḥen. Ad asen-iniɣ d tagnit i kunwi akken ad teslem ad awen-slen. Ad ttweznem ayen i txedmem, d tagnit n usenqed. Ma yella rewwlen ɣef temliliyin, ad ḥsun belli rewwlen ɣaf usɣerbel.
Awal ɣef tejmilt n Ḥmed Laḥlu ?
Tajmilt i Ḥmed Laḥlu, imi netta neḥseb-it d aɛeggal n tddukkla. D netta i yellan deffir n tlallit n temlilit n tmedyazt n Yitri Adelsan n Uqbu netta d Dda Buɛlam Messusi. Yella diɣ deffir n tikti n usebded n usebdad n Si Muḥ u Mḥend. Win i wumi terra tajmilt tddukkla-nneɣ deg temlilit tamenzut. Mass Ḥmed Laḥlu, yewwi-d abrid yemgarad d wiyaḍ i t-yezwaren deg uḥric n tmedyazt, imi netta yeffeɣ-d yessufeɣ-d tamedyazt yid-s, imi diɣ yebɣa ad yerr azal i usefru d umedyaz. Ḥmed Laḥlu, d amedyaz yerran rruḥ i wawal armi yuɣal awal d tugna d tagit, d tanagit ɣer wawal yettilin deffir wawal.
D acu-ten wuguren i d-tettmaggarem yal tikkelt mi ara tt-id-suddsem?
Akken bɣun ilin wuguren nugi ad asen-neknu, imi nekni deg tddukkla, neqqar akken i d-yusa wass ad t-yeks umeksa, imi numen s wayen nxeddem, nwala s anida nteddu. Ssarameɣ kan imedyazen d tmedyazin, ad aɣ-d-fehmen. Ma yella wayen ur ad asen-d-nmudd, armi ur t-nesɛi ara, wamma aɣullu ur nettɣullu ara. Ma dayen-nniḍen, d ayen ttwalin akk medden, imi nekni neṭṭef rruḥ, timliliyin n tmedyazt bdant ttxasant, ihi akken yebɣu yili nekka-t ad nessider timlilit n tmedyazt n tddukkla tadelsant Itri adelsan n Uqbu. Menyif tella neɣ ulac.
Awal n taggara ?
Ad asen-iniɣ i yimedyazen, aru-t-d. Nekni nefka-awen tagnit, kunwi ur tt-tzeggelt ara. Cwiṭ sɣur-nneɣ cwiṭ sɣur-wen, akken ad nesnerni tamedyazt, akken ad as-neg amkan i umedyaz d tmedyazt. Axxam d axxam-nwen, timlilit d timlilit-nwen, ansuf yis-wen. Ula d kečč diɣen tanemmit-ik d tameqqrrant, imi yal abrid tettmudduḍ-aɣ tagnit ad d-nmeslay.
Yesteqsa-t Gh. A.