Accueil Tizi Ouzou ‘’Izem, d Mḥend i t-yenɣan, cciɛa-s d Abusliman !’’

Asmekti n tmettant n Imache Amar ( 07-07-1895/07-02-1960)

‘’Izem, d Mḥend i t-yenɣan, cciɛa-s d Abusliman !’’

3025
- PUBLICITÉ -

Iḍelli n lḥedd, 07 deg furar 2021, i d-yella usmekti n ubabat n Umussu aɣelnaw akked ENA (Itri n Tefriqt ugafa), Imache Amar, deg taddart-is At Meṣbeḥ, deg tɣiwant n Wat Dwala. Acu kan, tajmilt n useggas-a, tella-d kan d tafessast  imi yella waṭṭan-agi n Covid-19. Ihi, ahil n usmekti yerza kan asrusu n tmuqqinin n yizeǧǧigen akked kra n tnagiyn. Yebda amennuɣ-is asertan Imache Amar seg wasmi yesɛa 18 n yiseggasen deg leɛmer-is, meḥsub seg ṭṭrad amezwaru n umaḍal, armi i d-yuɣal ɣer tmurt deg useggas n 1947. Yebda amennuɣ s usaki akked yiwellihen i yettmudu i ixeddamen ɣef wayen yerzan timunent n tmura n Tefriqt n ugafa i yellan, imir,  s ddaw n temhersa tafransist.

- PUBLICITÉ -

Ciṭ cit, armi i  ssawḍen ad gen anejmuɛ ameqqran deg tmurt n Fransa ass n, 07/12/1924, anda llan ugar n 100 000 n yimdanen. Dɣa din i d-tella tikti n uslali n CONA (Congrès des ouvriers nord-africains), i yuɣal, sin n yiseggasen mbeɛḍ, d ENA iɣef yella d aqerru Messali Lhadj xas ulamma 3/4 n yiɛeggalen n ENA, d Iqbayliyen.  Rnu ɣer waya, tiktiwin  n Messali akked tid n Imache, mgaradent seg uẓar akked yiswiyen deg wahil n Umussu aɣelnaw, ladɣa deg wayen yeɛnan tamagit, amezruy akked tmuɣli iɣef ara tbedd tmurt : Imache, yebɣa-tt d tanaṣlit s wansayen d umezruy amaziɣ, ma d Messali i  yesɛeddan aṭas n wussan akked Chakib Arslan, yebɣa tasnakta (idéologie) taɛrabt-tineslemt s ddaw n tecḍaḍt n’’Ɛulama inselmen’’ d wiyaḍ. Ula d Leqbayel, aṭas i yfkan afus. Tewweḍ teswiɛt  armi i as-ugin i Imache ad yemmeslay deg Tizi Uzzu, ma d Messali, gan-as irebbi deg tmanaɣt n Ǧerǧer. Syin ɣer da, yeḍra wayen yeḍran : ‘’Ayen nettidir ass-a, yeḍra-d yakan zik-nni, maca akken-nniḍen’’, i d-yesmektay yal tikkelt unaẓur.

Hocine Moula    

- PUBLICITÉ -