Deg wagguren-agi kan ineggura i d-yeffeɣ walbum amaynut n ucennay ilemẓi Ahcene Bedrani. Mbeɛd tasfift tis snat i d-yeffɣen deg useggas n 2015, yuɣal-d tineggura-a s tesfift tis tlata, iwummi isemma “Leflani”. D tasfift tamaynut ideg llant 10 n tezlatin s teqbaylit, gar-asent: Leflani, Ad am d-hduɣ tizlit, Ssmeḥ, Tella lehna, Mazal ṣṣifa-m, Tekcem ɣer wul-iw mazal…atg. Tuget n tezlatin yellan deg-s, ttawint-d ɣef tayri d leḥmala, yecban tizlatin-a: Mazal ṣṣifa-m, D kemm i d zzher-iw…atg. Am wakken yerra diɣ tajmilt i tmeṭṭut s tezlit-a: Ad am d-hduɣ tizlit. Ula d ssmeḥ d lehna, yecna fell-asen deg tesfift-a.
Llant diɣen snat-a n tezlatin : Ssmeḥ, Leflani iwummi i d-yules s uẓawan kan. Ma d tizlit “leflani”, ideg yekkat deg win i t-yettɛassan neɣ i t-yerran d axsim, yeqqar-as deg-s: “Uh a leflani, xas beddel tikli, mačči d nekk i d axsim-ik, … ruḥ ad tɛaseḍ ijufar-ik…”. Am wakken daɣen, i i yecna tizlit-nni n « Abrasli ireqqen » n uneɣmas n rradyu tis snat d umedyaz Said Friha. Yefka-as ttesriḥ i wakken ad as-iɛiwed ad tt-yecnu s wudem atrar. Ad d-nesmeki kan belli, Mass Bedrani d tagi i d tasfift tis tlata ara d-yessuffeɣ mbeɛd tinna n 2001 “Yeggra-d lexyal” d tinna n 2015 “Tuzyint”. D mmi-s n taddart n Ikhelouiene deg tɣiwant n Ait Aissa Mimoun. Di taggara, nessaram-as afud igerrzen i ucennay-a deg umecwar-is.
A. A.