Yella unnar aɣurbiz n Bgayet, ass n 24 yunyu 2019, d rreḥba n tejmilt i yuɣalen i uɣewwaɣ Lwennas Meɛtub.
S uheggi n tddukkla Meɛtub Lwennas Ccfawa d Usiweḍ, d tallelt n waṭas n yimeɣnasen d yilemẓiyen, iɛedda ugala n tejmilt akken ilaq, si 19:30 n tmeddit armi d meqrub tazeggant n yiḍ.
Ula d tirza, ugar n yinaẓuren i d-yerran i tiɣri, aṭas n yimdanen i d-yusan si berra n Bgayet, abeɛda tawacult n Kamal Ddin Fexxar d wiyaḍ si Merruk. Mi yebda usihar, bedden yimeḥḍar ddqiqa n tsusmi ɣef yiẓiɣer n mmi-s n Tewrirt Musa.
Syin, ttɛeddayen-d yicennayen yiwen yiwen i tiwin n tezlatin i d-heggan i lmend n tejmilt-a. Seg yicennayen ilemẓiyen i icennun s ugerrez tizlatin n Meɛtub Lwennas, yella daɣen Karim Mersel, mmi-s n Uweqqas, i d-yewwin amur-is n ccna. Am netta am Ɣilas Terki d Nasira Benyusef, i d-yecnan kra n tezlatin n Meɛtub.
Zedek Mulud mi d-yuli s asayes, yewwi-d kra n ccnawi d tajmilt i Meɛtub Lwennas, ama d ayla-s, am Lezzayer-inu d Taqbaylit-nni, neɣ n uɣewwaɣ, am « Yir Lehlak ». Seg-sen daɣen, tuli Malika Dumran ad d-tawi s waṭas n leḥzen kra n tezlatin d yicewwiqen n tejmilt i Lwennas akked kra n tezlatin-nniḍen yecban « Ay asaru ».
Uleḥlu daɣen, am yal tikkelt, ur icuḥ i yiman-is deg tegnit-a n ccna di Bgayet, seld lɣiba n 20 n yiseggasen. Yella yemqarab mliḥ akked uzayez, abeɛda mi cennun lwaḥi tizlatin « Pouvoir assassin » d « D arraw n tlelli ».
Ɛli Ideflawen, dima s teḥdeq-is, yella daɣen di ttiɛad mi d-yecna kra n tezlatin, send ad yeǧǧ abrid i wiyaḍ. Ɛli Ɛemran, s uɣanib-is atrar i yesnum i medden, yecna-d kra n tezlatin. Tajmilt tesmurres ɣef tnaga n uzayez d yimekkiyen, abeɛda imi i d-tesbeggen d akken llan wid yettkemmilen deg ubrid n Lwennas Meɛtub.
M. K.