Tezga-d tesnawit n umeɣras Idris Maɛuc di tɣiwant n Tsexriwt, i yeggugen s wazal n 60 n yikilumitren ɣer unẓul-asamar n waɣir n Bgayet. Iselmaden n tesnawit-a, llan ɛebban armi d iri seg waṭas n tlufa i yerzan ttawilat n uselmed d tneččit n tesnawit. Ɣef wakken i aɣ-d-yenna yiwen n uselmad, ttidiren seg wacḥal d ayyur tura yir liḥala deg usɣur-nni, ɣef tmentilt n lexsas n wallalen igejdanen i uselmed, am tfelwit, imruyen akked ssmex d tferrawin. «Aṭas-aya nekni nettmeslay ɣef lexsas-a, ulac win i aɣ-d-yerran.
Iṭabluyen qdimen merra, imruyen iwatan ur ten-tettafeḍ ara. Asufeɣ n tewriqin d awezɣi. Rnu-as liḥala ur nelhi ideg yella ulabu d tzeqqa n tsenselkimt. Ula deg tneččit, ur bedden akken iwulem i warrac », i d-yenna uselmad-a. Seld-aya ihi, gan tagant (asunded) ɣef teɣzi n ukuẓ n wussan. Ugin ad uɣalen i usɣer alamma yerra-d unemhal i wayen ssuturen, neɣ ad d-tger iman-is tkadimit ad tefru aɣbel. D ayen i d-yellan ddurt yezrin mi d-tceyyeɛ tkadimit taseqqamut i tesnawit, akken ad temlil d yiselmaden yettnarafen. Seld anejmuɛ i ten-yezdin azal n kraḍ n yisragen, ssawḍen ad msefhamen ɣef usemres n tsutriwin d tuɣalin i uheyyi n temsirin.
Ssutren deg unemhal ad d-yaɣ allalen ilaqen i uselmed akken ad yefru wugur-a amezwaru, di leɛḍil ad d-lhun d wid-nniḍen imalasen-a n sdat-nneɣ. Ilaq ad d-nini d akken, seld annim-n d taganin, aṭas n uxeddim i yettraǧun arrac, iselmaden d yinedbalen akken ad qeɛɛden taluft, ad sgerrzen ulamma azuḥ aswir amatu n tesnawit ur nelhi iseggasen-a ineggura.
M. K.