Yunes Drisi, d yiwen n yilemẓi i yesεan 27 n yiseggasen kan di leεmeṛ-is, ɣas ma yella meẓẓi, meεna ayen yexdem yessemɣeṛ-it deg wallen n umaḍal s umata. Aqcic-agi, seg wid ifaqen d akken imal n tezmert, d tudert n umdan, yebna ɣef waddad n tezdeg n twennaḍt. Akken neẓṛa, deg yiseggasen yezrin, ṭṭuqten lehlakat deg tmura n ddunit s umata, dɣa seg usrag ɣer wayeḍ, ttnulfun-d ddeqs n waṭṭanen. Amihan deg-sen d win n uxenzir iwumi qqaṛen lehlak n leqṛen. Mebla ma nefka i yiman-nneɣ tuttriwin ɣef tmentilt-nsen, tiririt tban am tafukt; imi d abeddel i d-yeḍṛan deg twennaḍt gar zik d tura i d-yesnulfan yal aṭṭan. Ccil tura aṭaṣ i d-terna tetiknulujit i tmetti ur tt-neksib zik, meεna seg tama-nniḍen, tegla s ugama d tezdeg-is, s udem amatu tessexser tawennaḍt. Gar yimeɣnasen i yekkaten ɣef yizerfan n twennaḍt, Yunes Drisi i d-yesnulfan tikti n » Trash tag challenge « , neɣ s teqbaylit « Acqirrew n ugudu ». Tikti-a, tabna ɣef usizdig n umḍiq i yellan yexnunes, win igan leqdic-a n usizdeg, ad yexdem tawlaft deg umkan-nni uqbel ad t-yessizdeg, am wakken ad yernu tayeḍ seld asizdeg. Ayagi i wakken ad walin medden amgarad yellan gar snat n tewlafin-a, ama seg tama n ccbaḥa, n yemɣan i d-yettemɣayen neɣ seg tin n uḥulfu n umdan. Ad d-nesmekti d akken leqdic-a, yebda-t-id Yunes, dɣa yebḍa-t deg uẓeṭṭa Internet, syin bḍan-t aṭas n medden, ddmen ccɣel-is d amedya n umennuɣ ɣef tkulujit. Yuɣal Yunes d agellid n twennaḍt deg umaḍal s umata, acku zzhir n tiɣri-s yewweḍ s tsussmi deg ukuẓ n tɣemmaṛ-is, dɣa aṭas i yeddan deg ubrid-is ɣiwlen i uceyyeε n tewlafin sdat yimeḍqan i berzen nutni. Ɣer taggara, yewwi-d fell ad t-nessebɣes, acku ayen yexdem, d ayen ara d-yawin abaɣur i tmetti tamaḍlant. Nessaram ad lḥun yilemẓiyen deg ubrid-is.
K. K.