Ussan-a kan yezrin i d-yessufeɣ ucennay aqbayli Slimane Chabi sin walbumat ɣer tezrigin Rex Productions. Gar 14 n tezlatin i yellan deg-sen, ad naf tijmilin i yerra unaẓur i yicennayen iqburen yemmuten, wigi d Sliman Ɛazem akked Zerruq Ɛellawa.
Am wakken i as-yerra tajmilt, diɣ, i tmeṭṭut taqbaylit. Xas ma mazal yesseqdac ucennay Slimane Chabi taḍsa d umezgun deg tezlatin-is akken ad yesɛeddi izen-is s ucmumuḥ, maca tikkelt-a, yewwi-d amaynut s wudem-nniḍen, ama seg tama n uẓawan, ama seg tama n tmedyazt. Akka, dɣa, i d-yewwi isental ɣef wayen yerzan akk timetti : Tayri, tanfalit, ashissef,…atg. Ma nebder-d kan tezlit ‘’Qabel-iten’’, ad naf dagi acennay iga aserwes gar win ixeddmen s tmussni i wakken ad tenfali tmetti-is, akked win i yenwan ad tbeddel s llebsa d učamar : gar wid yessaɣayen tafat akked wid i tt-yessensayen.
Yeqqar-as : « Qabel-iten kečč s učamar… ». Nezmer ad d-nebder tizlatin ‘’Lallas n tullas’’, ‘’Hommage à Z.Allaoua’’, ‘’Ayen i neɛwez’’, ‘’Rut ay idurar’’, ‘’Rwaḥ’’, ‘’Akken tebɣu tili’’,…atg.
Hocine Moula