Asmi i tt-id-snulfan aseggas n 1990, taklinikt n Lbeṛǧ n Mira, tella seg tid yesεan ddeqs n yiqeddicen. Am tzeqqa n tarrawt n tullas, tazeqqa n ṛṛadyu. Lameεna, ass-a imi yimɣuṛ umḍan n yimezdaɣ n tɣiwant n Tṣexṛiwt, dɣa ḥwaǧen mačči kan taklinikt, meεna d sbiṭaṛ. Nneεdamen ttawilat deg teklinikt-a, ayagi imi tazeqqa n tarrawt, rran-tt d tanezduɣt n yimsujjiyen, ur nxeddem deg teklinikt-a. Ma yella d tazeqqa n ṛṛadyu, ur d-iban later-is. Ccil mazal kra n uxeddim ileḥḥu deg-s, besseḥ ulac d acu i iteddun akken ilaq.
Urǧin yeffeɣ-d umuḍin syinna yecmummeḥ. Tikwal ulac amsujji, tiyaḍ yettili lameεna ur ttεeddayen ara yimuḍan akk, acku rezzun-d ddeqs deg yiwen n wass. Yerna d yiwen n usaru i d-yettilin ula akked umsujji n tuɣmas, tikwal ulac-it, tiyaḍ yella ulac ddwa n usduflet. S wudem amatu, nezmer ad d-nini taklinikt-a, txuss deg ddeqs n temsal. Ur siken ara ula d llufanat imecṭaḥ d tyemmatin-nsen seg yir liḥala n teklinikt-a. Dɣa, mi ara d-yaweḍ lawan n ucṛaḍ, ttεessant tyemmatin ddeqs n yesragen i wakken ad asent-d-tsaḥ nnuba. Daymi i ilaq ad d-afen tifrat s uɣiwel i uɣbel-a.
Γef usentel-a, yenna-aɣ-d yiwen n yilemẓi : «Yewwi-d ɣef yimḍebbṛen n tɣiwant, ad d-afen tifrat i temsalt-a, acku ur telli turart deg tezmert n umdan. Ilaq ad tt-smeɣṛen teklinikt-a, ad tt-id-ḥyun daɣen. Ahat ad selken kra n yimuḍan i yettmettaten deg yiberdan-nsen ɣer sbiṭaṛat-nniḍen».
K. K.