Ha-t-an ugzul n tmenniwt n Massa Lynda Ouatah, taselmadt deg tesga n Tutlayt d Yidles n Tmaziɣt Tasdawit Abderrahman Mira n Bgayet. Tewwi-d awal deg usarag-is ɣef usentel-agi : « Tamettant d usirem deg tmedyazt n Lwennas Matub ». Anda i d-tenna belli : « Lwennas Matub, deg yisefra-ines, yemmeslay-d ɣef waṭas n tlufa i iceɣben imdanen, ama deg tmurt n Lezzayer ama deg tmura n ddunit merra. Yewwi-d awal deg tezlatin-is ɣef waṭas n yisental, yecban : Tayemmat, tagmat, lɣerba,tumast, tayri, tamurt, adabu, lxir, ccer…atg ». Tkemmel tenna-d : « Nekk, awal deg temlilit-a tussnant, ad d-yili ɣef usentel n tmettant d usirem deg tmedyazt n Lwennas Matub.
Dɣa wwteɣ ad d-awiɣ ɣef wudmawen s awayes i d-yettban usentel-a akked wamek yezḍa wassaɣ gar snat n tnaktin-a (tamettant akked usirem) i d-yettbanen yiwet mgal tayeḍ ».Ɣer taggara, tenna-d : « Tamettant d usirem d inmeɣrad, timettiyin tilsanin akk ttmeslayent ɣef yisental-a. Deg tmetti taqbaylit, wwin-d fell-asen yimedyazen i t-id-yezwaren. D acu kan ayen i d-yewwi Lwennas Matub d amaynut ɣef tmettant d usirem sdat n wamek i d-wwin fell-asen wiyaḍ deg yisefra-nsen. Yettban-d wannect-agi, imi netta yezḍa assaɣ gar snat n tnektin i d-yettbanen d tinemgalin : Ma tella tmettant ur yettili usirem; ma yella usirem ur tettili tmettant. Lwennas Matub, deg yisefra-ines, yeskan-iten-id dduklen, zdin, qqnen wa ɣer wa: Tamettant daxel n usirem; asirem daxel n tmettant ».
A.G.