Tiɣri i d-gren srabes n liḥala n tegnewt d uɛeggen i yimdanen ɣef leḥder yessaferrer kra n lexsarat ahat deg uḥric n twaɣiwin n yiberdan, maca yella wanda i d-nnulfant kra n lemḍarrat yeglan ula s terwiḥin. Deg yiḍ n larebɛa ɣer lexmis yezrin, ageffur d waḍu ǧehden mačči d kra, almi ula d iqudas n usufeɣ n waman, ur ssawḍen ara ad ssufɣen anect-nni n tḥemmal i yettazzalen deg yiberdan d yizenqan n temdint. Tasebḥit n wass n lexmis, iɣallen n usellek ffɣen-d i wakken ad ssifsen taɛkemt ɣef medden, imi llan kra n yimukan reglen-ten waman. Ɛerḍen ad ldin yiwet n tadimt ara yessufɣen taḥemmalt. Dɣa din, i tegla tneggarut-a s tlata seg yiɛeggalen-a n usellek. Yekker wahruḥu deg umkan, ssawḍen yimeddukkal-nsen ad d-ssukksen sin seg lmeḥna, ma d wis tlata tejbed-it tnifift ur ẓrin anda yedda. Imḍebbren n twilayt ɣef uqerru-nsen lwali Mustapha Limani, usan-d s amkan ideg teḍra twaɣit-a anda ttawilat akk iwulmen ttwasxedmen i wakken ad d-ssukksen tafekka n uɛeggal n usellek, maca mačči d ayen i isehlen fell-asen. Deg tamiwin-nniḍen, ladɣa lewhi n taddart n Yilyiten, d asyax n ubrid i d-yellan tama n lluzin n trisiti, d ayen yeǧǧan imḍebbren n uḥric-a gezmen trisiti azal n 12 n tsaɛtin i wakken ad sbeɛden taḥemmalt i d-yerran ɣer lluzin-a. D ayen yeǧǧan imezdaɣ n Yilyiten ttɛeddin-d kan seg ubrid i d-yettawin ɣer Saḥriǧ, imi win n wasif asemmaḍ yettwagzem.
Smail. M