Thegga-d tesdawit n Nante di tmurt n Fransa yiwet n temlilit i yeɛnan tasnilest n tmaziɣt ussan n 07 akked 06 duǧember iɛeddan. Leqdic-a, yettwahegga-d sɣur Yesnidi n tesnilest n Nantes (Laboratoire de linguistique de Nante, CNRS & Université de Nantes) akked tddukkla tadelsant n Yimaziɣen n Nante (A.C.B 44). Deg teseqqamut tussnant ad naf imussnawen n tesdawit n Strasbourg, London, Maroc, Tizi-Ouzou, Batna, Nante…
Ma d ahil n usiher, yella-d akka ass n 6 di duǧember : Yella-d usarag n Massa Amina Mettouchi s yizwel “Pour un devellopement durable de la linguistique berbère : les enjeux de l’oralité”, syin akkin d Mass Fayssal Bouarourou n tesdawit n Strasbourg, Said Bouzidi tasdawit n la Sorbonne nouvelle, Béatrice Vaxelaire akked Rudolph Sock n tesdawit n Strasbourg “Compare to reconstruct : the case of brfoken plural in kabyle”. Ma yella tameddit n wass : yella usarag s uzwel “L’ordre des mots en berbère zénaga : Règles morpho-syntaxique , contraintes de la communication et choix énonciatifs» sɣur Catherine Thane-Cheikh , syin akkin d Vermondo Brugnatelli : «Nouvelles données sur une innovation phonétique du touareg»… atg.
Gar wid i d-iheggan timliliyin-agi, yella Mass Bedar Amaziɣ (D aselmad di tesdawit n Nante), nesteqsa-t a-t-an d acu i d-yenna : «Nwala iseggasen-a ineggura, xuṣṣent temliliyin ɣef tesnilest n tmaziɣt di tmura n Luṛup, dɣa neqsed ad d-nessewjed yiwet anda ara nesssemlil widak yakk i iqeddcen ɣef tutlayin timaziɣin. Tella temlilit-a d tagnit i d-ijemɛen azal n 25 d amnadi, deg-s, seknen-d leqdicat-nsen, yerna slan i leqdicat n wiyaḍ. Mačči kan anagar widak i iqeddcen ɣef tutlayin timaziɣin i iḥeḍren, meɛna “ldint tewwura” i widak yakk i yebɣan ad slen yerna ad ẓṛen anda i ddant temsal n tutlayin timaziɣin”.
Yamani Souhila