Seg twaɣit ɣer tayeḍ i iḍerrun deg twilayt-a n Wehran, seg tirɣi n yixxamen ar twaɣiyin n ubrid d tmenɣiwt n rruḥ d uɣelluy n yixxamen. Qerriḥ daɣen asmi ara yerr umdan tilist i tudert-is. Dɣa d ayen i d-yeḍran deg tazwara n ddurt yezrin, asmi i walan yimsebriden n ubrid aɣelnaw n Ssanya tafekka n teqcict ad tesɛu gar 16 ar 18 n yiseggasen di leɛmer-is teḍleq, ma d rruḥ-is yewweḍ bab-is, seld mi d-tḍegger iman-is s ufella n tqenṭert yellan kan nnig ubrid. Ɣef ssebbat i yeǧǧan tilemẓit-a ad tenɣ iman-is, ur d-banent ara swaswa, ɣas akken teḥbes taɣuri-ines di tesnawit maca ɣef wid i tt-yessnen, nnan-d ur tesɛi ara uguren n uxxam neɣ n berra, walan kan belli ur yerkid ara ttexmam-is taggara-a.
kh. a.