Ur d-yusi yisalli yessefraḥen aseggas-a i yimrebbiyen n tzizwa d wid yakk tecɣeb taluft n twennaḍt s umata. Ahat ugur n twennaḍt d umihi ideg ttidirent tzizwa banen-d aṭas-aya, maca yal aseggas amek ara yilin yigemmaḍ d uzbu n tid i ixeddmen tamemt di teɣrasin.
Dɣa, deg ugezdu n Bgayet, ɣef wakken i d-nnan wat tzizwa, tenqes ayendin lɣella-nsen aseggas-a, ma nga aserwes d yilindi. Ɣas ddeqs n wallalen i sseqdacen, am wakken zgan bedden akken iwulem i teɣrasin-nsen, meɛna ur ten-yenfiɛ waya imi tazmert n ugama d tegnaw tekka-d nnig takkit (kullec). «Nekk ilindi, lɣella talemmast i yal taɣrast n tzizwa tewweḍ armi d 15 n yikiluyen n tamemt. Ma d aseggas-a, ur d-greɣ ula d kraḍ n yikiluyen i teɣrast. Seg-s ad d-kkseɣ kra, ilaq daɣen ad ǧǧeɣ ayen ara ččent tzizwa », i d-yenna yiwen n yimrebbi n tzizwa si Bgayet.
Send ad d-yernu ad d-yini ɣef tmentilin n waya: « Akken yella di tannumi, tseɛɛu tzizwit azal n kraḍ n wayyuren akken ad d-tawi seg yijeǧǧigen anikṭar d upulin, gar wayen ara tečč d wayen ara d-texdem d tamemt. Wanag aseggas-a, ur tḍul tefsut ddeqs akken ad tesɛu tzizwit akud ad tesselzem iman-is d teɣrast-is. Seg ungugi akuluji, nwala asemmiḍ iḍul cwiṭ, ajeǧǧig yejjex di kra n wakud. Ɣef waya ur xdiment ara tzizwa s waṭas », i d-yemla.
Yewwi-d ad d-nesmekti d akken ula i berra n unnar n teɣrasin, tettenṭerray mačči d kra tzizwit mi ara tafeg ad d-tawi tagella, imi tettɛedday tikwal armi d 4 n yikilumitren di tebɛed si teɣrast. Seg yiwet n tama, yettawi-tt lḥal tkess deg tbeḥyar n yifellaḥen i yesseqdacen isufar i tt-yettḍurrun, si tayeḍ, mi ara taf tiẓeḍt deg yiguduyen i yettenḍeggaren deg yal adeg, tettrus dinna, syinna aha ad temmet neɣ ad tawi avirus i teɣrast. Ɣef wawal n yimsenza, yezmer lḥal ad tali tamemt di ssuma ayyuren i d-iteddun imi ixuss ugmar aseggas-a.
M. K.