I lmend n imuras n tegrest, tessuddes-d tddukkla n useḥbiber ɣef twennadt d ugama, Ixulaf n At Zɛim, yiwet n tmeɣra i warrac imecṭaḥ. Tella-a tmeɣra-agi ass-nni n, ssebt iɛeddan 21 seg waggur n duǧembeṛ 2019, deg Tzeɣwa n yinejmuɛen deg taddart n At Zɛim, yetabaɛen ɣer tɣiwant n Mɛatqa. Aṭas n leqdicat i yesɛan azal meqqren i yettwajerden deg wahil n temlilit-a, gar-asen tullya n temkarḍit n taddart n At Zɛim, ara d-yilin d annar n tussna d unadi i yinalmaden d yisdawiyen, d yiwet n tsetnayt i igerrzen, ad d-yefken Afud meqqren i warrac deg leqraya-nsen, deg yiswiren yemgaraden.
Tella-d tullya n temkarḍit s wudem unṣib sɣur uselway n Useqqamu Aɣerfan Aɣiwan n Mɛatqa, Mass Laguel Lyes, ɣer yidis n Uselway n tesqqamut n taddart, Mass Si Hamdi Rachid, d unemhal n Uɣerbaz alemmas Ounnar Muḥamed n Mɛatqa, d inemhal n yiɣerbazen imenza n taddart. Ugar n 10 000 n yidlisen, deg yiḥricen n tussna yemgaraden i yellan deg temkarḍit-a, ladɣa ayen i icudden ɣer yidles amaziɣ, amezruy, tadamsa, tusnakt, aɣaṛam, idlisen n tutlayin tibeṛraniyin d yidlisen n unelmad n yiswiren yemgaraden. Mbaɛd tullya d usefqed n temkarḍit sɣur yimdanen i iḥeḍren deg tmeɣra, yella-d ufraq n lḥelwa ɣef warrac imecṭaḥ , syin tella-d yiwet n lwaɛda meqqren, i d-heggant tlawin i ittekkan deg tddukkla Ixulaf n At Zɛim.
Syinakkin, tebda tmeɣra n warrac. Deg tazwara, s ccna d ctaḥ, i tukksa n lxiq ɣef warrac imecṭaḥ, syin usan-d yibaqticen (clowns) yesseḍsen arrac, anda i d-zzin i taddart. Aṭas n leqdicat-nniḍen i d-yellan deg tmeɣra-agi, ama d amezgun n warrac imecṭaḥ, ama d talilt n warrac n tddukkla i d-yecnan ɣef useḥbiber ɣef twennadt d ugama. Akka i fkan awal i warrac, akken ad d-alsen timucuha d temɛayin, ad d-ccnun, daɣen ad d-sefrun. Deg taggara n tmeɣra, thegga-d tddukkla yiwet n tsentayt i igerrzen nezzeh, anda tarra tajmilt meqqren i kraḍ n tgejda n umussu adelsan i d-yefkan afud meqqren deg leqdicat yemgaraden i d-suddusent tddukkliwin tesɛa taddart n At Zɛim, d teseqqamut n taddart.
« Ayen i d-nehḍer fell-asent drus. Lxir-nsent yezwar, ayen i d-nebder deg wayen i d-fkant d tallelt i taddart drus », i d-yenna yiwen n umerzdaɣ. Tuɣal diɣ tejmilt i Massa Guerdad tassadit, Massa Namane Dahbiya, d Massa Asmani Wardiya. Ferḥent nezzeh temɣarin-agi n lbaraka s tejmilt-agi.
Ali Zalouk