Tettwassen taddart n At Mbarek, i yettabaεen tɣiwant n tṣexṛiwt, s leqdic adelsan n yilemẓiyen-is, ladɣa deg wayen i icudden ɣer yidles. Arrac n Tṣexṛiwt s umata, llan seg yimezwura i d-yesnulfan tiddukkliwin tidelsanin. Imi d nutni i yeldin tawwurt i ddeqs n yinaẓuṛen, εeṛden-ten-id ɣer Uxxam n yilemẓiyen, yerna deg yiseggasen n 80. Gar-asen Massa Bucafa. Akken yeqqaṛ yinzi ‘’Win i d-yettuṛebban ɣef kra, ad yemmet fell-as ». Ihi ilemẓiyen n Tṣexṛiwt, mazal-iten qeddcen deg unnar. Aredmani zik ulac aṭaṣ n yiεeggalen di tddukkliwin, ass-a amḍan-nsen yennerna. Gar tddukkliwin i yeṭṭfen amkan iṛeṣṣan deg tɣiwant-a, tiddukkla tadelsant « Tadukkli » n At Mbarek, d tin yessεan azal meqqṛen ɣuṛ yimezdaɣ.
Ayagi imi, ama d aselway-is, ama d imeltaɣen-is, xeddmen ayen yellan fell-asen i wakken ad d-rren i yidles aqbayli, d umaziɣ s umata, udem-is idetti deg taddart-nsen. Ula d izerfan n At taddart, d nutni i yettazzalen fell-asen. Γef usentel-a, yewwi-d ad d-nebder belli d nutni i yessḥeṛṛṣen imḍebbṛen n tɣiwant armi i asen-d-fkan tibettiyin timeqqṛanin n ugudu. Meḥsub imezdaɣ n taddart n At Mbarek, llan ur ksiben ara ibidunen anda ara deggṛen ahicuṛ-nsen. Mebla ma nettu d akken, aɣbel-nsen ageεmir d Axxam n yidles, i yettwabellεen acḥal-ayagi. Nutni dɣa, zgan deffir n uselway n tɣiwant i waken ad as-iεiwid axeddim.
Tessemliliy-d tddukkla-a, daɣen, At taddart deg uxxam-is, deg ddeqs n tegnatin. Ama d timliliyin tidelsanin, ama d isaragen. Tikkelt-a, i wakken ad d-sfugglen aseggas amaynut n yimaziɣen 2970, thegga-d tddukkla tadelsant « Tadukkli » ahil d amerkanti i wussan n 10,11, akked 12 yennayer. Aṭas n leqdicat ara yilin, abeεda, timsiknin, ticeqqufin n umezgun, timsizzliyin n tuččit igerrzen. Ad d-nesmekti d akken ula d iḍebbalen ad ilin di ttiεad. Di taggara, ssxebṛen-d inebgawen-nsen belli ad d-yili yimekli i ilmend-nsen. Nessaram-asen afud uzmir.
K. K.