Yettnerni uḥric n tmedyazt taqbaylit d uxeddim n yimedyazen. Wa yettaru i yicennayen, wayeḍ yessefruy i yiman-is, wayeḍ, wayeḍ. Mbeɛd mi yettneri usizreg n wammuden n tmedyazt, yettuqet diɣ usuffeɣ n tezfifin (C.D) n tmedyazt. Dayen diɣ, ara yessnernen imeɣriyen n tmedyazt, imi llan wid ur nessin ara ad ɣren tamaziɣt, akka meqqer ad slen ayen akken bɣan ad t-ɣren.
Dɣa, deg wussan-agi kan iɛeddan i d-yerna umedyaz d umaru Ahcène Mariche tasfift-is tis kraḍet n yisefra iwummi isemma “Tiderray”, i d-yessuffeɣ ɣer tezrigin Blue Sound. D tasfift n tmedyazt ideg llan 33 n yisefra s teqbaylit yeččuren d sser akked ccbaḥa n wawal. Ayen i d asen-ikemmlen temleḥ i tmedyazt-agi, imi tettwaseḍfer-d s uẓawan aḥlawan yeddan di lmizan n yisefra-a.
Yessexdem deg wallalen n lmusiqa, yecban: Tajewwaqt, Snitra, Mandole…, annect-agi i wakken kan ad asen-yefek rruḥ d ccbaḥa i yisefra-agi. Yessefra deg-s ɣef tayri, ɣef tmetti, ɣef tudert, tidet, tajaddid, lmut, yeḥka-d tudert n umdan s umata. Gar yisefra yellan deg-s, ad nebder: Abernus, Kkes-iyi-d ɣef wul-iw, Tawizet, Leǧruḥ, Tidet telha i tmenna, Tugdi di tayri…atg. I usmekti kan, 33 n yisefra-agi yellan di tesfift-a, yessuffeɣ-iten-id qbel d ammud n tmedyazt iwummi isemma (Tiderray) di 2007, syin yesseddukkel-it d sin yidlisen-nniḍen Taɛezzult-iw akked Yiḍ yukin, yessuffeɣ-iten- deg yiwen wammud di 2009. Am wakken diɣ, ara d-nini belli amedyaz-a ɣur-s azal n 20 n wammuden n tmedyazt, ɣer tama n yidlisen-nniḍen.
Llan yisefra-s, yettwasuqlen ɣer wugar n 15 n tutlayin, llan diɣ wid ccnan yicennayen meqqren n teqbaylit. Yeqdec diɣen deg unnar n ssinima, imi yurar deg ddeqs n yisura n teqbaylit, ɣer tama n uselmed-ines deg uɣerbaz alemmas n Tizi Raced. Ɣer taggara, ad d-nesmekti belli, yetturaǧu ad yessewjed ddeqs n yidlisen-nniḍen sya ɣer sdat, yecban ungal, ammud n yinzan, timucuha akked tmedyazt i t-izedɣen.
A. A.