Macahu, tellemcahu ad tt-yeḍbeε Ṛebbi d asaru. Qqarren zzman, yella yiwen n umdan d amesbaṭli acku d bab n draε u yesεa adrim swayes yuγ akk imdanen. Uuγalen s ddaw n ufus-is. Ihi, ṛṛay d ṛṛay-is γas γer yiγzer awal d awal-is ,γas ma yexser. Win ad d-yekkin mgal ines, ad as-iceyyeε iḍan-is, ad sεeddin fell-as lbaṭel. Yiwen n umdan, yesεa tabγest (d akuraji), yugi ad yuγal am wiyaḍ d axeddam-is, neγ xersum ad yessusem am umeγbun n taddart-nni yečča lḥif d tmara. Ihi, win akka, wayeḍ akka ulamma argaz akuraji ur yexdim ara kra, maca ur yekni ara i ddel, yerna at taddart yettban belli ḥemmlen-t γas ur d-sbeggnen ara ayen-nni. Si tama-s, amcum-nni ur t-yeεğib ara lḥal. Xedmen-as yiwet n tcerket i ukuraji-nni akken ad d-tesweqqɛen.
Yewweḍ γer sdat n lqaḍi, yenna-as: ‘’A leflani, aql-ak cetkan-d fell-ak at taddart belli la tzerεeḍ ccwal di tseqqamut, tebγiḍ ad tfarqeḍ tacemli’’. Akuraji : ‘’A sidi lqaḍi, nekk d amdan urğin nwiγ lexsara i yiwen, ruḥ steqsi imeγban yugten di taddart ad a k-inin’’. Lqaḍi iṣṣub-d γer taddart, yejmeε-d at taddart, la ten-yesteqsay. Seg wakken yaf-d lḥal yeggul deg-sen umcum-nni, cehden-d akken yebγa netta, yal yiwen akken i as-yemehmuh. Mi akken kfan, yenṭeq umcum nni: ‘’Twalaḍ a sidi lqaḍi, acu I d-qqarren?’’ Lqaḍi yaf-d lḥal yeḥdeq yessen: ‘’Ala, ur walaγ ara, sliγ kan’’. Amcum: ‘’Amek?’’ Lqaḍi: ‘’Sliγ i lehduṛ-nsen, maca ur walaγ ara ulawen-nsen’’.
Yahia Yanes