Segmi yettwabna Umezgun n tzegzewt deg taddart n Ayt Ɛisa, taɣiwant n Uweqqas, ayendin d armuden i n-yettwaheggan s uɛraḍ n waṭas n yinaẓuren yemgaraden, ama d tirebbuyaɛ n umezgun, d icennayen, d imsaragen neɣ d imalasen. Ussan-a dɣa, yendeh deg ubraḥ warmud adelsan, ladɣa asenɛet n tceqqufin n umezgumm seg tmeddit d asawen. Ihi, i lmend n teẓrigt tis semmus n wuḍan n umezgun n Ayt Ɛisa, thegga-d tddukkla tadigant armud ideg i d-ttwasneɛtent ddeqs n tceqqufin deg yiḍ, mi d-rrant i tiɣri n tddukkla « Tadukkli » trebbuɛay yemgaraden n twilayt n Bgayet. Ama d tarbaɛt n Ticci n Mass Sɛidi, neɣ d tin iwumi ssawalen Ifeṭṭiwjen n temnaḍt n Tmeẓrit.
Daɣen, ula d acennay Lwennas Tagrawla, yewwi-d ass-nni kra n ccnawi berra i ubeḥri. Kra n wussan ɣer sdat, tettwahegga-d rreḥba n ccna sɣur unaẓur Azal Belqadi, seld winna n Tyaqut, Lwennas Gerruj d Arezqi Yaɛla. Imir-nni, nezmer ad d-nini ala tizlit taɣerfant i d-yettwawin i uzayez. Ddurt yezrin daɣen, muggen deg umezgun n Buṭeɣwa sin n yiḥuna (ateliers) s tallelt n kra n tddukkliwin n Bgayet. D ayen i yeǧǧan ad yili umalas Fares Idir d inebgi n yiḍ-nni, ideg i d-yessawel timucuha i warrac. Ayendin d annecraḥ i yezmer ad yettwaɛqel deg wudmawen n yigerdan di teswiɛin-nni. Yewwi-d ad d-nesmekti d akken yella-d lebni n umezgun-a azegzaw s tedrimt d ufus n yiɣermanen kan. D isenfaren am wi i yelha ad nettwali di Tmurt n Yiqbayliyen.
M. K.