D tawaɣit neɣ d amihi wayen akken i d-ijemɛen imdanen n tama n temdint tajdidt deg twilayt n Wehran akken ad ẓren ma ad izmiren ad gen kra i usellek n wid yellan deg wadeg i deg tendeh tmes meqqren ass n amhad iɛeddan. Iḥun Rebbi teslek s talwit u ttwasuffɣent-d snat n tlawin yellan daxel n usečču i d-yezgan deg yinig wis sin war leǧruḥ sɣur uɛeggal n uḥuddu aɣarim Seḥnuni Ɛebdelqader neɣ asaḍ akken i as-ssawlen kra n wid yellan din, imi yessaweḍ ad yali seg berra ɣer yinig wis sin s tebɣest ur nesɛi tamtilt, u yexdem lwaǧeb ilaqen, yessemneɛ-d tirwiḥin.
Ma d timental i yeǧǧan times-a ad tekker, d sin n lexyuḍ i yerɣan deg udigan n tnezzut yellan ddaw n usečču-a uqbel ad tali d asawen anda llant snat n tlawin, akken kan walant abbu d tmes d ijajiḥen bdant isuɣan. Dɣa ass-nni yakan, tuɣal tejmilt i uɛeggal-a n uḥuddu aɣarim, acku yella deg wussan-is n usteɛfu, ɣas akken yexdem ayen ilaqen i usellek n terwiḥin, dɣa yessuli-as umasay-ines deg ugrad, akken daɣen i yemmeslay yid-s lwali n Wehran, yerna-as asebɣes.
Ad d-nesmekti kan belli Seḥnuni Ɛebdelq ader d aqbayli yettidiren di Wehran, tadra-ines seg wasun n At Dwala.
Kh. A.