Taddart n Wizran am tuddar akk n tmurt n Leqbayel, d yiwet n taddart tameqqrant. Akken i d-ḥkan yimɣaren n taddart-a, semman-as «Wizran», d yiwen n umdan iwumi qqaren Aεednan akked d umeddakkel-is, leḥḥun leḥḥun deg teẓgi armi i d-ssawḍen ɣer umkan-a n Wizran, yenṭeq Uεednan yenna i umeddakkel-is : «Wissen isem-is umḍiq-a ideg nella !» Yerra-as urfiq-is : «Wi yeẓran !» Seg wass-nni yeqqim akka yisem n taddart d Wizran. Llan, wid i d-yennan semman-as Wizran imi imezdaɣ-is imezwura, d At n tebɣest am yihran ( izmawen ).
Nnan-d, axxam amezwaru i yeẓẓan deg taddart-a, d axxam n Uεednan. Tezga-d taddart n Wizran deg Ugni deg tiɣilt, seg tama n ugafa d Iɣill Ɛli, Belεeyyal : ɣer umalu, d taddart n Ginzat d Buceqfa ; ma ɣer tama n usammar, d Tizi Ɛelwan, ɣer unẓul, d At Ɛidel d Tawrirt Uεebla. Teṭṭafar lεerc n At Ɛebbas, taɣiwant-is d Ayt Rzin, seg wasun n Yiɣil Ɛli, aɣir n Bgayet. Tesεa azal n 1800 nyimezaɣ, wa d amḍan n useggas n 2018. Deg taddart-a, ad tafeḍ yiwen n ubrid d agejdan, qqaren-as abrid n Yimrabḍen d awesεan d kra n yiberdan-nniḍen d tberdatin n uḍar yettawin ɣer yizenqan d yixxamen. Daɣen, ɣur-s kraḍ n leğwameε : lğameε n ddaw n Ssur, d aqdim, lğameε n Tiɣilt n ufella, lğameε n Tizi n waḍu.
Am wakken yella yiwen n unnar ideg tturaren yilmeẓyen ddabex n uḍar. Degt lemmast n taddart, ad naf yiwet n lqahwa akked sebεa n tḥuna. Iseggasen-a ineggura, slulen-kra n yilmeẓyen yeɣran yiwet n tddukkla iwumi semman : Itri n tlelli, d yiwet n tuddsai iqeddcen aṭas ɣef wansayen n lejdud-nneɣ, am wakken daɣen tettεawan imezdaɣ n taddart deg yal tagnit. Wizran, d yiwet n taddart yeččuren d tiliwa yecban Tala n Melyu, Ajejḍar…atg. Mmalen yimezdaɣ-is s waṭas ɣer tfellaḥat: ulac win ur neksib tazemmurt, ama deg yiḥerqan neɣ tama n uxxam-is.
Mucaεet taddart n Wizran, deg umezruy, s 86 n yimeɣrasen i yeɣlin d asfel deg lgirra n 1954 mgal acengu afransis, meḍlen deg tmeqbert n ccuhada daxel n taddart-a. GM. Aḍris-a, uran-t-id yinelmaden n useggas wis sin, aɣerbaz alemmas 11 yimeɣrasen Tiɣilt Buceqfa. Aseggas aɣurbiz 2019 / 2020. Ismawen n yinelmaden, Ğεefri Tilelli, Ɛisani Tafat, Twati Cahra, Bensaleḥ Ḥusam.
Adel Bachouche