Ur wwiḍen ara sḍis n wagguren segmi i d-yella usewseɛ n tama n wadda n umraḥ n yimrigen neɣ “Place d’arme” akken i yettwassen, d asenfar i yeččan azal n 6 n yimelyaren. Almi taggara-a uɣalen yimdanen ttcetkayen seg waṭas n lixsas i d-yellan deg umkan. Yeldi ass n umenzu n unbir 2018 yezrin, newwi-d fell-as dɣa awal deg Uɣmis n yimaziɣen, d lwali n Wehran i t-yeldin, u deg umeslay-is lawan-nni, yesseḥres akken ad yettwaḥader wadeg-a, ad yettwasizdeg akken ilaq u ad yili deg-s laman.
Annect-a merra d taɣiwant n Wehran i d-yewwi ad tt-testeklef yis-s, ma neẓra d akken d amkan i d-yezgan di tlemmast n temdint rnu yecbeḥ, d ayen ara d-ijebden ladɣa tiwaculin ad qqiment di laman. Maca, segmi yebda waggur n Remḍan, imdanen tteffɣen deg yiḍ ad kksen ɣef lxaṭer-nsen u ad ttun aẓummu d laẓ n wass kamel. Tiwaculin i ifernen amkan-a i usteɛfu, zgant d acetki seg lixsas n tafat imi tuget n llambat i as-d-yezzin, xsint yakk, rnu ɣur-s lixsas n laman imi ur nettaf ula d yiwen seg yiɣallen n laman dinna seg lxemsa n tmeddit d asawen, ladɣa tura aql-aɣ deg waggur n Remḍan, ma d imdanen yal wa anda iḥemmel ad yawi abrid-is deg yiḍ.
Ula d tifewwaṛin-nni n waman yellan di tlemmast i d-yettaken initen icebḥen, seg waggur-nni amenzu ur d-ssuffuɣent ara aman. Dɣa asteqsi i d-yettuɣalen dima, ayɣer yal mi ara d-tili tullya n kra n uṣenfar i lfayda n yimdanen ur d-yettili ara uḍfar-ines akken ad yeqqim kan akken yella d amaynut ? D anwa i d ssebba neɣ d anwa ur nxeddem ara ixeddim-is, d wacu i ilaqen akken ad yekfu lḥif n uḍegger n udrim deg ulac ? Iban yakk d akken yal yiwen s uḥric-is n tuzzma am umasay am umdan s timmad-is.
Khaled Achoui