Waqil mazal asaru-nni n yimenɣi d usemres n yiɣil deg tesdawiyin n tmurt yettkemmil. Mbeɛd acḥal d abaxix yeḍran ussan-a yezrin d wayen i d-ssegran, d wayen akk iḍerrun deg yiseggasen iɛeddan. Asexdem n yiɣil yessaweḍ ad ɣlint terwiḥin, seld tamettant n yilemẓi-nni deg tnezduɣt tasdawant deg tmanaɣt, akken daɣ i iruḥ d asfel yiwen usdawan seg tmurt n Zimbabwé.
Deg tesdawit n Wehran, ass n aram yezrin, medlent tewwura n tesga n tutlayin sɣur Tiddukkla tamatut n yinelmaden izzayriyen, ssebba n waya, d imenɣi i d-yellan gar yiwen unelmad d uselmad-is deg ugezdu n tutlayt taglizit. Ma d timental n yimenɣi-a, yeɛreḍ unelmad-nni daxel n tzeqqa n ukayad ad d-yeddem azmam, ɣas yeẓra d ayen yeffɣen i usaḍuf, d ayen i yeǧǧan aselmad ad as-yekkes tifert n ukayad, dɣa tiririt tella-d s yiɣil d tyita sɣur anelmad-nni ur neqbil ara ṛṛay-a.
Ayen yessewhamen deg taluft-a, d anelmad-nni i iruḥen sakkin yessers acetki ɣur Tiddukkla tamatut n yinelmaden izzayriyen, d ayen i ten-yeǧǧan ad medlen tiwwurra n tesga-a i sin n wussan. Annect-a, yegla-d s yiwen n ugraw meqqren azekka-nni, anda i d-mlalen yiselmaden merra n ugezdu d unemhal n tesdawit d kra n yiɛeggalen seg tiddukkla n yinelmaden, ayagi akken ad d-afen tifrat i wugur-a. Ma d asteqsi i d-yettuɣalen dima; d acu-tent tmental i d-yessawaḍen imenɣiyen yettilin zik deg yiberdan ɣer daxel n tesdawit yettuneḥsaben d aɣbalu n tmussni u d adeg yesɛan iseɣ? D acu i d tifrat n wugur-agi ? *
K. A.