I lmend n usfugel n useggas amynut n yimaziɣen, yennayer 2969, yeffeɣ-d wuṭṭun wis 5 n tesɣunt « Aselmad ». Ɣef wakken i d-nnan yimḍebbren-is, tella yakan deg yigrawen n yiselmaden n tmaziɣt neɣ deg ugraw “ Tasɣunt Aselmad- Revue Aselmad” deg uẓeṭṭa n Facebook. “Tiklet-a, d tajmlit i kraḍ n yirgazen i aɣ-yeǧǧan deg wussan iɛeddan, wigi d Mulay Seddiq sliman, amnir n Dda Lmulud, Muḥend Akli Haddadu akked Ɛli Helli”. I aɣ-d-yenna Mhenna Halit. Deg tesɣunt-a, ad naf azal n 40 n yiḍrisen : Iḍrisen n wullis, iḍrisen n usegzi, iḍrisen n uglam, iḍrisen n yimesfukel, taceqquft n umezgun. Rnu ɣer waya, yella urmud n yisefra. I tikelt tamezwarut, ad ternu tesɣunt Aselmad 7 timsirin n tmaziɣt. D timsirin i yezmer ad yexdem uselmad n tmaziɣt ama deg uswir amezwaru, aswir alemmas neɣ deg tesnawit. “Uran-d deg-s 25 n yimyura, yal yiwen ɣef wacu i d-yura. Llan wid i d-yuran i tikelt tamezwarut, llan wid yuran, yakan, deg wuṭṭunen iɛeddan. Nessaram d tasɣunt ara d-yawin amaynut i uselmed n tmaziɣt deg yiɣerbazen”, i d-yesseggra yimḍebber amezwaru n tesɣunt. Gar wid i d-yuran, ad naf Arezqi Iɛemrac, Aribi Massi, Xaled Ɛecwi, Bacuc Ɛadel, Lyas Belɛidi, Qader Belɛidi, Cahrazad Ayt Benɛli, Fahim Mesɛuden, Lwennas Tayeb, Mhenna halit, Ḥamdac Sara, Ǧellil Suhila,…atg.
Hocine Moula