Yeldi tiwwura-s uxxam amaynut i tɣiwant n Sidi Ɛic deg taggara n waggur n duǧember n useggas iɛeddan. Seld qrib ukuẓ n yiseggasen segmi i bdan lebni-ines. Ammas-a amaynut, yettwaxdem s talɣiwin d leṣnaf n tudert tamirant yemhazen. Deg-s yal ameẓlu n lekwaɣeḍ s wadeg iman-is d tzeqqa n uraju. D ammas yellan d awesɛan, imi yewweḍ deg leɛli ɣer kraḍ n yinigen. Akken daɣen i xedmen deg-s ibduzen d texxamin n tarda i win yeṭṭef lḥal.
Ad t-naf ur yebɛid ara aṭas ɣef wammasnni aɣiwan aqdim, imi anagar 100 n lmitrat i yellan gar-asen deg uzniq-nni i d-yezgan deg temlilit n rebɛa n yiberdan, iwumi ssawalen azniq Ainouche. I usmekti, tikkelt tamezwarut asmi bdan deg-s lebni, ḥaren yimasayen ma d axxam n wasun (dayra) neɣ n tɣiwant ara t-ssalin, armi d aseggas yezrin i tt-fran d akken ad t-rren d axxam n tɣiwant ara yesnefsusin taɛkemt ɣef yimezdaɣ n temdint-a meqqren d tɣiwanin i as-dyezzin (semmus n tɣiwanin i yesɛa wasun n Sidi Ɛic), seg wid ladɣa i ilulen deg wasun-a.
Kh. A.