Yuɣal-d Kedym s tezlit tamaynut : »Yella usirem ». D tizlit yecna akked ucennay ameqqran Zedek Mulud. D tizlit i d-yettmeslayen ɣef liḥala n tmurt n Leqbayel akked d wansayen-is yettruḥun. Tizlit, truḥ am wakken d adiwenni gar yilemẓi n wass-a yuysen taqbaylit akked umussnaw yeččuren d asirem, i as-yekksen aɣbel. Ad yeffeɣ klip ass, n 11 unbir 2020, di snesla n Yutube n Kedym (https://www.youtube.com/kedym). Deg-s, ad nḥulfu s utqelleq n Kedym ɣef wansayen yettruḥun akked tutlayt yettaǧǧan ilsawen, d teswiεt i beddlen s umata. Si tama-nniḍen, amussnaw, Zedak, yekkes-as aɣbel, yettarra-as-d asirem. Ar taggara n tezlit, yenna-as : »Skud tell-am, mazal asirem ». Ma d imeslayen n tezlit, yura-ten umedyaz Fahim Mesɛuden.
Agzul n tmeddurt n Kedym
Karim Xedim s yisem-is n ucennay KEDYM, d mmi-s n ucennay Ḥmiduc, ilul-d, 23 yennayer 1990, di temdint n Tizi Uzzu. Yedder iseggasen-is imezwura di taddart n Ɛeṭṭuc, taɣiwant n Makuda (Tizi Uzzu). Asmi yesɛa setta (6) n yiseggasen, tawacult-is tunag ɣer Fransa. Qqimen zedɣen di temdint n Marsay ar ass-a. Xas akken yettidir di tmurt n Fransa gar iṛumyen, maca ur yettu yara taqbaylit-is i d-yeṭṭeḍ deg yidmaren n yemma-s. Yettmeslay-itt, icennu yis-s. Deg useggas n 2017, yessekles tizlit-is tamenzut, « Aɣyul yezga iɛebba » anda i d-yewwet s leqseḥ ɣef yir liḥala tettidir tmurt, d wugdud yerwan lḥif. Ur iɛeṭṭel ara, yesseḍfer-d tizlit n tayri s klip, azwel-ines « Dayen », s yimeslayen ḥninen, ẓiden. Deg useggas n 2018, yerna yessekles tizlit-nniḍen s klip, « Asdawan » anda d-yesseqcer leǧruḥ n yisdawanen akked yir liḥala n yilmeẓyen yeɣran qqimen mebla axeddim. D wid akk i d-yewwin igerdasen-nsen ur d-ufan iqiḥ, ala asenned ɣer leḥyuḍ. Yessekles aṭas n tezlatin « Fell-am, sliɣ, Abuhal, Dayen… » llant akk di snesla n yutub-ines : « (https://www.youtube.com/kedym ».
Fahim Mesɛuden