Ass-nni n ahad 31 deg waggur n yulyu i d-yella usunẓu s wudem unṣib n tullya n urasu (le tunel) Sidi Ɛebdlqader, i yettawin ɣer wadeg imarri La brise de mer deg temdint n Bgayet. Leqdic d lecɣal, bdan deg tazwara n waggur n yulyu kan, sɣur yiwet n tkebbanit.
Ɣas akken yiwen n waggur kan i yezrin segmi bdan, maca yekfa di lawan-is, acku d ccɣel i yezrin s tɣawla u akken ilaq. Iban-d wadeg-a izad di ccbaḥa seld keffu-ines, ma neẓra belli zik yella d aqdim, ur yettwaxdam ara akken iwata, rnu aman i d-ineggin s ufella. Maca tura, icuba s waṭas irasuyen n tmacinin timeqqranin i yellan di tmura n L’europe d Marikan, ɣas akken mecṭuḥ, s tafat yettfeǧǧiǧen daxel d uẓru d wuzzal yehhuskin swayes yettwabna.
Rnu ɣer waya, amkan-a n La brise de mer, d win yettwassnen di temdint n Bgayet, yecbeḥ mačči d kra, imi ula d asagen n Bgayet din i yella s yiɣerruba yemxalafen, daɣen d amkan ideg ttemlilin yimdanen, ttɣaman, steɛfuyen ar tama n yilel timeddiyin n wass, acku abeḥri n din ḥlaw. Tura, yegra-d kan ɣef yimdanen i d-irezzun ɣer wadeg-a, neɣ ɣef yimezdaɣ n temdint n Bgayet akken ad t-ḥadren, ad t-ǧǧen akken yella zeddig d amaynut acku d nutni yakan i yenfeɛ deg tfesna tamezwarut.
Kh. A.