Yeffeɣ yisalli ussan yezrin ɣef tukerḍiwin i d-yettilin deg ssuq n Xeṛṛata, imi aṭaṣ n medden i yettwakren: Wagi yetwaker-as usawal, wayeḍ d idrimen, ula d tullas dɣa, ur slikent ara.
Tamsalt-a, tesnerna-d aṭaṣ n tuggdi deg wulawen n yimezdaɣ, daymi i sxebṛen iɣallen n laman i wakken ad ḥeṛsen taεessast di ssuq-a, i d-yeḍḥan d amahi ɣef wid i d-irezzun ɣer dinna, ama seg tɣiwanin n tdayṛa n Xeṛṛata, ama seg tid-nniḍen am At Smaεel, akked Tṣexṛiwt. Ccil ulac wid ur nesli ara s tukerḍiwin-a. Imakaren ur ugaden ara, d anemgal, kemmlen di lecɣal-nsen.
Dɣa ddurt yezrin, yessawel yiwen n umɣar i yiqeddacen n yiɣallen n laman, acku yella win i as-yukren ugar n umelyun. Yerna amakar-a, yekkes-asen-t-id seg lǧib-is srid, ifaṛeṣ tagnit imi d amɣar ur yezmir ad yazzel deffir-s. Lameεna, tumert n ubandi-a ur tdum ara bezzaf, imi seld tanaga n umɣaṛ-a, i yeṣṣawḍen yefka tiweṣṣaf n umdan i t-yukren i yipulisen, ineggura-a uzzlen i uḥeffu fell-as. Di taggara ufan-t, imir-n i yebɣa ad d-yeffeɣ seg ssuq ad yerwel.
Ad d-nesmekti d akken, ula d imezdaɣ xedmen ayen ilaqen, s umecṭuḥ s umeqqṛan. Asaru-a, yekfa s tumert, imi amakar-a d win i yesεan abrid ixemjen, yerna mačči di Xeṛṛata i yezdeɣ, meεna di temdint n Bgayet. Lḥaṣul, iεedda di ccṛaε di teɣdemt n Xeṛṛata, anda i yeḥkem fell-as uselway-is s sin n yiseggasen d lḥebs, akkeḍ sin n yimelyan d idrimen.
K. K.