Ad tafeḍ yiwen yekseb iεemmuṛen n cci, maca yiwen ur isel. Wayeḍ ma yekseb awtul, ad yaweḍ lexbar ula d uccen.
Yeqqar Sliman Σazem:
Zzux zzux d lmecmel
Ttalasen deg-s akk leğnas
Γer medden meṛṛa yeshel
Menwala ad izux ayla-s
Zzux d lhedṛa baṭel
Ulac fell-as lexlas.
Γef wayagi, ttawin-d Leqbayel yiwet n tmacahutt, dγa d tagi. Di tezgi, yeγli-d yiḍ. Kecmen meṛṛa yiγersiwen s ifran-nsen i wakken ad steεfun si laεtab n wass. Iγid neγ aqelwac, ha-t-an la yesbeεbuε, ittemḍaγa s teγzi n ugeṛjuj-is, armi lğiran-is meṛṛa, iḥeṛṛem-iten di tnafa. Iruḥ-d γur-s uḥelluf yenna-as: «Annaγ ay aqelwac, ur aγ-teğğiḍ ara a ngen, d lxiṛ kan ?».
Aqelwac: «D lxiṛ kan ay aḥelluf d taγaḍt (meḥsub tameṭṭut-is) i d-yurwen, aql-i ferḥeγ la cennuγ».
- Acḥal i d-turew, ma ulac uγilif ?
- Sin yiγiden Llah ibarrek.
- Sin i d-turew, thebleḍ akk tizgi ?
Dγa aḥelluf, yeṭṭef-d aqelwac seg učamar-is yenna-as: « Ṛwaḥ ad twaliḍ tileft (taḥelluft) acḥal i d-turew. Iwwi-t γer usgun n tileft, yufa-n aṭas n yilfan imecṭaḥ, yefqeε, yenna-as uḥelluf: « Twalaḍ acḥal i nurew, ulac win i aγ-d-yeslan, keččinni sin n yiγiden tesguğğeḍ fell-aγ tanafa. Yuγal-d uqelwac yessusem.
Yahia Yanes