Aṭas n yiselmaden akked yinelmaden, n yal tama, i yesseqsayen ɣef udlis n tmaziɣt n uswir amezwaru deg uɣerbaz alemmas, win iwumi qqaren ‘’Tasuta tis snat’’.
Kra deg-s (iselmaden), ɣillen d lexsas, wiyaḍ rran ṭṭlima ɣef yinemhalen, nwan d nutni i yestehzan. Acu kan sebba n waya, ha-tt-an deg yirebbi n wid-nni i ilaqen ad seḥbibren ɣef uselmed n tmaziɣt. Yuzzel wawal,d akken tamsalt, tcudd ɣer yir assaɣen i yellan gar wid i d-iheggan adlis-a akked tesqamut n uztazal d tɣuri-s. Neɛred ad nẓer sebba n waya, ad nẓer acimi ur d-yeffiɣ ara udlis-a ar tura, nesteqsa yiwen gar n yiɛeggalen n tesqamut n uktazal d tɣuri, yenna-d ’’ Tasqamut n uztazal d tɣuri, ur teqbil ara adlis-aimi ur iwulem ara i wahil n tsuta tis snat. Ayen yellan deg-s, dayen yellan deg udlis-nni aqdim. Ciṭ kan swayes yemgarad. Ihi, ɣef wanect-a i ur t-teqbil ara tesqamut, mačči akk ɣef wayen-nniḍen.’’ I wakken ad nẓer, diɣ, rray n wid ixedmen adlis, nessawel-as i yiwen deg-s, yerra-d ɣef wanect-a : ‘’adlis i as-nefka, iwulem. Ur neẓri ara i wacuɣer ur t-teqbil ara tesqamut-nni. Yerna wagi ad yeqqim kan d rray-nnsen, meḥsub d rray n tesqamut-agi tamezwarut. Adlis, ha-t-an gar yifassen n tesqamut-nniḍen ara t-iɣren, aql-aɣ la nettraǧu. Ayen yellan deg udlis, yettwakkes-d seg wahil unṣib n tneɣlaft n usegmi, ur yeffiɣ ara seg-s.’’ Akken yebɣu yili rray n wa akked wa, akken tebɣu tili ssebba i yeǧǧan adlis ur d-iteffeɣ ara, iselmaden akked yinelmaden, ha-ten-in mebla adlis n tmaziɣt, mebɛed 3 n smanat seg wasmi i uɣalen s aɣerbaz. S waya, zyada-nni i yernan i lweqt n uxeddim deg useggas (4 smanat), iruḥ-as akka tura i tmaziɣt ! Anda laqrar-is. Ɣef laqrar-agi, dɣa, nesteqsa amaswaḍ n tmaziɣt deg lwilaya n Tizi Uzzu, yenna-d :’’ad nesḥissef aṭas ɣef wanect-a imi i d-tella tuɣalin ɣer uɣerbaz mebla ma yewjed udlis n tmaziɣt n uswir amezwaru n uɣerbaz alemmas, tasuta tis snat xas ulamma adlis-a, d taɣuri kan n wahil unṣib n uswir-a. Zemren ad ilin aṭas n yidlisen i yiwen wahil’’ nesteqsa-t ɣef wamek ara qablen taswiɛt, ikemmel yenna-d :’’aql-aɣ akka tura deg tannant n yiselmaden ijdiden. Ad neɛreḍ ad nqabel taswiɛt akken iwulem imi zemren yiselmaden ad d-heggin i yiman-nsen ttawilat swayes ara slemden. Swaya, dɣa, ara nnaɣen tannumi i wakken ad tteklen ɣef yiman-nsen, mačči kan ɣef wiyaḍ’’.
Sya ar tifrat n wugur, nessaram d akken tamsalt ad teqqim kan deg unnar n usegmi, d tamsalt n uselmed n tmaziɣt mačči d tamsalt gar yimdanen. Ladɣa mi ara yili wid teɛna tedyant-a, d imḍebbren ɣef uselmed n tmaziɣt deg lwilaya n Tizi Uzzu.
H.Moula